FIFA ranking-a 100-na India

Football khawvela thuneitu sang ber FIFA chuan ranking a ti chhuak leh ta a, zanina SAFF Championship semifinal khel tur India chu top 100-ah an inhlangkai - ranking thar tihchhuah hma khan India hi 101-na an ni.

India hian June thlaah ringawt khan 4.24 ranking points an hmu a, Asian Football Confederation (AFC) hnuaia ram zingah chuan 18-na an ni phak - tun ranking hian July thlaa World Cup qualifier draw neih hunah India tan nghawng a nei ngeiin a rinawm.

Ruahman dan chuan July 27-ah World Cup 2026 qualifier draw hi neih a ni dawn. Tuna ranking ang chuan India hi pot 2-ah an awm thei dawn a, Asia khawmualpuia ram ṭha zual 17 zinga pariat chu an hmachhawn lo thei dawn tihna a ni.

Hetihrual hian FIFA hian engtikah nge ranking thar an tihchhuah leh dawn hriat a ni lo a, July 27 hmaa an tihchhuah leh hman chuan SAFF Championship-a an result-in India dinhmun a nghawng dawn - a awlsam zawnga sawi chuan, top 100-a awm reng turin India tan SAFF nomawi chawi a ṭul dawn.

March 2018 khan India hi FIFA ranking-ah 99-na an ni a, tun hi hemi hnua top 100-a Blue Tigers an awm leh hmasak ber a ni. India hian kum 2023-ah tlawm an la nei lo a, September 2022-a VFF Tri-Series-a Vietnam laka an tlawm hnuah khan tlawm an nei leh tawh lo - vawi sarih chakin, vawi hnih draw an nei.

Hetihlai hian world champion Argentina chuan ranking number 1 dinhmun an luah chhunzawm zel a, pahnihna France leh pathumna Brazil te pawhin ṭhut hmun sawn tum loin an la luah nghet rih hle.

Belgium chu panganaah tla thlain, England-in palina dinhmun an luah thung a, Nations League final-a chak lo hlim Croatia chu paruknaah chhoin, Ronald Koeman hnuaia insiamṭhat harsat Netherlands chu pasarihnaah an tla thung.

Italy (8-na), Portugal (9) leh Spain (10) te chu top ten-a awm dang an ni a, Asia aṭanga dinhmun luah sang ber Japan chu 20-na niin, Iran-in 22-naah an dawt a, 27-naah Australia an awm a, 28-naah South Korea an awm bawk.