SAFF final khel tur Lianzuala telna India

SAFF Championship final khel turin India an inpetkai ta - Blue Tigers hian Inrinni zan khan Lebanon chu penalty hmangin 4-2 in an hneh a, SAFF final an khel dawn.

Lallianzuala Chhangte telna India leh Lebanon inkhelah hian team pahnihin goal an khung thei lo a, extra time khelh hnuah pawh goal a lut lo - minute 120 chhungin goal an khung thei lo ve ve.

A tawpah penalty hmangin a chak zawk chinfel a ni a, India tan Sunil Chhetri, Anwar Ali, Naorem Mahesh Singh leh Udanta Singh ten an khung vek laiin, Hassan Maatouk leh Khalil Bader ten Lebanon tan an hlah a, 4-2 in India an chak - inkhel boruak sangah hian Lebanon assistant coach Dejan Trickovic chu red card pek a ni.

Bangalore khawpuia semifinal inkhel hmasa zawkah Kuwait chuan 1-0 in Bangladesh an hneh bawk a, Thawhlehni zan dar 7:30-ah SAFF champion zawnna neih a ni ang.

Inkhel hmuhnawm

Sree Kanteerava Stadium-ah India chak hmuh duhin fans 19,000 chuang an pungkhawm a, a tir aṭangin team pahnih an innawr nghal - chance nei hmasa zawk erawh Lebanon an ni a, India ṭantute thin phu a rang.

Inkhel ṭantir têah Nader Matar chuan chance nei mah se a chhawr thei lo a, Zain Al Abidine Farran hun duhawm pawh India keeper Gurpreet Singh Sandhu chuan ṭha zetin a dansak a, India-in tlarhnung venhim a ṭul tih an hrethiam nghal.

Defensive midfield-a awm Jeakson Singh chuan centre back puih hna a thawk tel zui a, India tlarhnung a phui sawt - hei hian midfield-a Jeakson nena inkawp Anirudh Thapa tan zalenna zau zawk a siamsak a, India an hmuhnawm sawt.

Mahse, Blue Tigers hian Sahal Abdul Samad leh Pritam Kotal hmanga an chance neih an chhawr thei lo a, Lebanon tana Maatouk-a freekick GSS-a dan pawh ṭha tak a ni.

A goal thei lo

Chawlhlawk hman a nih hnuah Lebanon-in bul an ṭan ṭha zawk a, India goal an rum ṭhaih fo - Lebanon tan hian bench aṭanga luhtir Karim Darwich, Walid Shour leh captain Maatouk ten chance an nei vek a, mahse, an vanneih zan a ni lo.

Mual vei lamah Lianzuala a hmuhnawm reng a, mahse, a tlan chak êm avanga 'Mizo Flash' hminglem an pek ball thlawh luhin awmzia a nei hleithei lo a, a chance neih a chhawr thei bik lo bawk.

Minute 90 chhunga team pahnihin goal an khung theih loh avangin minute 30 dang an khel leh a, mahse, team pahnih hian goal an khung thei chuang lo - Sunil Chhetri-a'n chance duhawm nei mah se Lebanon keeper Mehdi Khalil-a'n ṭha zetin a dansak.

Lianzuala pawhin chance nei leh mah se Khalil bawk a paltlang thei lo a, a ball cross hlauhawm tak Indian player-ten an lo khawih hman loh te, hun tawp hnaih lama a chance Khalil-a'n a lo dante chu uiawm tak vek a ni - Udanta Singh-a'n ṭha taka ball a lakluh hnua a pet goal loh pawh kha a thlirlet ang a, a ui ve khawp ang.

A chinfelna penalty

Blue Tigers hi coach Igor Stimac chuan Kuwait laka red card a hmuh avangin a ho thei lo a, assistant coach Mahesh Gawli kaihhruaina hnuaiah an inkhel - Stimac hi match hnih atan hrem a ni a, $500 (Rs. 41,048) chawitir a ni bawk.

India-in inkhel boruak sangah coach tel loin inkhel an hmachhawn a, penalty pet a ngai zui. Mahni muala khel mah ni se Blue Tigers tan a hlauhthawnawm a, fan-ten hlauthawng takin an thlir.

Mahse, India tan Chhetri, Anwar, Mahesh leh Udanta ten an chhuih lut a, Lebanon tan Walid Shour leh Mohamad Omar Sadek te chiahin an pet goal theih avangin Lebanon an tlawm.

India leh Lebanon hi tun hnaia vawi thum an intawnna a ni a, Blue Tigers hi vawi hnih an chak a, vawi khat an inhnehtawk - mahse, SAFF-ah penalty hmangin an chak hram a, team pahnih intiat tawkzia a lang.

A hautak

Mizo forward Lianzuala'n minute 120 zet a khel tluan a, Lunglei tlangval chuan Lebanon hmachhawn a hautak thu sawiin, "A chauh thlak hle. Mahse, hliam nei loin ka khel tluan thei a, ka lawm khawp mai. Ni dang aiin ka khel ṭha zawkah ka ngai a, ka goal khungna chance ka chhawr lo erawh lawm a kim lo," tiin Vanglaini a hrilh.

Lianzuala chuan sawi zawmin, "Lebanon khan chak tumin an rawn khel dawn tih kan hre sa a, chumi tur pawh chuan kan inpuahchah. A tir minute 10 kha chu an thunun deuh a, a bak chu kan thununin ka hria," a ti a, penalty hmanga chak ni mah se chak phu zawk an nih thu a sawi - Lianzuala hi India tan a panganaa penalty pet tur a ni a, mahse, a pet ve hmain India an chak.

Blue Tigers hian Thawhlehni zan dar 7:30-ah Kuwait nen final an khel dawn - Kuwait hi group stage lama 1-1 a an inhnehtawkpui tawh kha an ni a, Blue Tigers tan hna a awlsam dawn lo.

Mahse, Lianzuala'n, "Final-ah kan tawn leh ngei ka beisei," tiin a lo sawi tawh a, chakna hun ṭha an tan a inher chhuak - Kuwait hian semifinal-ah minute 120 an khel ve tho a, minute 105+2 a Abdullah Al-Buloushi goal hmangin Bangladesh an hneh hram.