Liverpool-in Szoboszlai an lalut dawn

Season tharah Champions League khel dawn lo mahse, Liverpool-in player ṭha an hip loh phah lo a, RB Leipzig midfielder Dominik Szoboszlai chu Merseyside club hian an lalut dawn - he thuziak i chhiar meuh chuan an inlalut fel tawh hial mai thei.

Szoboszlai hi Leipzig-a a contract ang chuan euro maktaduai 70-a lei duhtu an awm chuan a chhuak thei ang, tih a ni a, Liverpool hian heti zata an lei ngam thu hi German club hi an hrilh.

Bundesliga club hian Inrinni khan an player Szoboszlai hi UK-a zin phalna an pe zui a, Hungarian attacking midfielder hian Reds-a medical nei turin UK lam hi a pan zui a ni.

Kum 22 mi Szoboszlai hian season hman zawh takah khan inelna hrang hrangah match 46 khelin goal 10 a khung a, assist vawi 13 a nei bawk - midfielder thuam chak ngai Liverpool tan chuan ani ang lakluh theih hi duhthusam tiin a sawi ngam.

Szoboszlai hian Austrian second division club Liefering aṭanga a professional career ṭanin, he club hi Red Bull Salzburg reserve team an ni - Salzburg-ah hian 2019-20 season aṭanga a hming rawn chher ṭanin, hemi season-ah hian Austrian Bundesliga Player of the Season-ah thlan a ni.

December 2020 khan Leipzig chu euro maktaduai 20-in a zawm a, Hungarian player man to ber record a siam. Mahse, German club a zawm season-ah hliam vangin a inlan thei lo zui a, season hnih chiah a la khelhsak tihna a ni - season hnih chhung hian match 91-ah goal 20 khungin, assist vawi 22 a nei.

Szoboszlai hian kum 2020 khan Liverpool boss Jurgen Klopp chu a lo fak chiam tawh a, Hungarian midfielder hian, "Klopp hi a mizia avang hian ka ngainat zawng tak a ni a, ka tan chuan khawvela manager ṭha ber a ni," tiin a lo sawi tawh.

RB Leipzig-ah Szoboszlai hian DFB-Pokal nomawi chu vawi hnih a chawi a, season hman zawh tak German Cup final-a Eintracht Frankfurt (2-0) an hnehna inkhelah goal a khung nghe nghe - Liverpool tan mamawh chhanna tih ngam a ni.

Reds hian nipui trans-fer-ah midfielder James Milner, Naby Keita leh Alex Oxlade-Chamberlain te chu an chhuahtir a, hei vang hian midfield thuam chak an mamawh.

Szoboszlai an dawr hma hian Brighton & Hove Albion aṭangin Alexis Mac Allister chu £35mtd-in an lo lalut tawh bawk a, hetihlai hian forward Fabio Carvalho chu Leipzig-ah season khat chhung loan-a khel turin an kaltir thung.

Kum 20 mi Carvalho hian season hmasa ṭan dawn khan Fulham aṭangin Reds hi £5mtd-in a zawm a, a khelh ṭhat dan a zira a man hi sang leh thei tur a ni. Season hman zawh takah khan Reds tan match 21 khelin goal thum a khung.

Liverpool hian third keeper Adrian chu an hnena season khat dang cham turin contract thar an ziahpui bawk a, kum 36 mi keeper hian kum 2019 khan West Ham aṭanga Liverpool hi free transfer-a zawmin, match 26 a khelhsak tawh.

Spanish keeper hian Reds tan Premier League, UEFA Super Cup, FIFA Club World Cup leh FA Community Shield-ah te nomawi a chawi tawh a, Liverpool a pan hmaa nomawi la chawi ngai lo keeper hian Merseyside club-ah a beisei ṭhin hlawhtlinna a chhar.