Chelsea striker thar Nicolas Jackson

Senegal striker Nicolas Jackson chuan Villarreal aṭangin Chelsea a zawm - Premier League club tan hian kum riat daih contract a ziak a, a man zat hi euro maktaduai 37 bawr vel niin an sawi.

Kum 22 mi Jackson hi season hmasa khan Villarreal tan player pawimawh a ni, a bik takin season tawp dawnah a pawimawh zual. La Liga match hnuhnung pariat aṭangin goal kua a khung a, May thla khan La Liga player of the month atan an thlang hial.

Season hmasa pumpui kha chuan La Liga match 26 aṭangin goal 12 a khung, club tana a ṭangkai bakah Senegal tan pawh a khel phak tawh. Qatar World Cup-ah khan an ram tana a match hmasa ber ni turin Netherlands a lo hmachhawn ve tawh a ni.

Chelsea hian tun nipui chhungin RB Leipzig aṭangin striker Christopher Nkunku an la tawh bawk a, coach thar Mauricio Pochettino kaihhruaina hnuaiah team thar din an tum mek.

Season hmasa khan London club hi Premier League-ah 12-na an ni a, kum 1994 hnu lamah season an hman chhiat ber ṭum a ni hial - coach Poch tan hnathawh tur a tam dawn hle tihna a ni.