Arsenal leh Chelsea midfielder Fabregas a chawl

Arsenal, Barcelona leh Chelsea midfielder hlui Cesc Fabregas chuan Inrinni khan football khelh a chawlhsan thu a puang.

Kum 36 mi Fabregas hian Spain tan World Cup nomawi a chawi a, Chelsea kawr hain Premier League nomawi vawi hnih a chawi a, La Liga-ah Barcelona a champion-pui bawk.

Fabregas hian nikum nipui khan Serie B Como tan kum hnih daih contract a ziak a, kum khat chauh a la hmang zo tihin boot khai a thlang ta zawk. Spanish midfielder hian Como reserve leh youth team a enkawl zui ang.

La Masia chhuak

Fabregas hian kum 10 mi lek a nihin Barcelona academy La Masia a zawm a, 1987 batch niin Lionel Messi-a'n academy a zawm hmain an batch zinga player thiam bera ngaih a ni.

Arsenal-in Fabregas-a thiamzia an hmuhin Barcelona aṭangin an la chhuak a, September 2003 khan kum 16 mi lek niin Gunners hi a zawm.

Season khatnaah hian Arsenal-in Patrick Vieira leh Gilberto Silva te an kawl avangin kum 16 mi Fabregas tan khelhna chan a har a, ṭawngah harsatna a tawk bawk. Chutihrualin kum 16 mi leh ni 177 mi niin League Cup-ah Wolverhampton Wanderers lakah goal a khung a, Gunners first team tana goal khung naupang ber a ni.

Season khatanaah hian Gunners hi Premier League-ah an champion a, Fabregas erawhin match khat pawh a khelh loh avangin champion medal a dawng ve lo. Kum 2004-05 season bul ṭan nan Arsenal leh Manchester United ten Community Shield an khel a, Fabregas-a'n bul ṭanin khawvelin an thiamzia an hria. Ni e, rawlthar duhawm sam buk chhep mai che vel khan Gunners fans chauh ni loin football ngainatute mit a titlai hle a ni.

Talent nei ṭha bik

Fabregas hian Arsenal tan season riat a khel a, season hmasa ber tih lohah chuan hmun pawimawh a chang ta vek. Gunners hi Communtiy Shield 2004 leh FA Cup 2005-ah chauh champion pui mah se kum 2006 khan Champions League final a thlenpui.

Arsenal-ah Fabregas-a'n nomawi a chawi tam tawk lo a ni thei a, an ram Spain erawh Euro C'ship-ah ṭum hnih 2008 leh 2012-ah a champion pui. Hei chauh hi a ni lo a, khawvel inelna ropui ang hiala an sawi World Cup 2010-ah a champion pui bawk.

World Cup champion puitu Spain squad innghahna hi Barcelona a tih theih a, Catalan club player-ten Fabregas hi a inzirchhuahna a let turin an thlem chhuak a ni ber. Kum 2011 khan Fabregas hian Barcelona a zawm a, Catalan club hi La Liga, Copa del Rey, UEFA Super Cup, FIFA Club World Cup leh Supercopa de Espana-ah a champion pui vek.

Kum thum hnuah Fabregas hi London-ah a kir a, Arsenal ni loin Chelsea-ah a ni thung. Spanish midfielder hian Premier League nomawi pahnih leh FA Cup leh League Cup pakhat ve ve a chawi. Talent nei ṭha bik Fabregas-a vul chhung a rei lo a, FIFA U17 World C'ship-a best player leh top scorer ni thei bakah Euro U17 C'ship best player ni thei player hian Chelsea a chhuahsan hnuah midfielder ṭha berte huangah a awm tawh lo.

Kum 2018 khan Fabregas hian Monaco a pan a, season li chhung khelin Ligue 1-ah match 54 khelin goal thum chauh a khung. Kum 2022 khan Serie B club Como tan a khel a, season liam ta khan league match 17 a khel a ni.

Pa lungawi Cesc

Arsenal midfielder hlui Fabregas chuan, "Football khelh chawlhsan mah ila lungngaihna tur hlir a ni lo. Tunah chuan Como Reserve team leh youth team ka enkawl chhunzawm ang. Club hmachhawp hian min tiphur hle a, he club ka zawm tirh aṭang khan an inrelbawl dan hian ka thinlung min hneh hle a ni," tiin a sawi.

Tun hma chanchin sawi chhunawmin Fabregas chuan, "Kum 20 chhung kha thawhrimna, inpekna leh lawmna tur hlir a ni. Tunah chuan ka game hmangaih hi mangṭha a ṭul a, ka hun tawnah ka lungawi. Barcelona aṭanga bul ṭanin Arsenal ka zawm a, Barcelona-ah kirin Chelsea, Monaco leh Como-ah te ka kal. Ka club khelhna zawng zawng hi ka ngaihlu vek.

"World Cup nomawi kan chawi te, Euro kan chawi te, England leh Spain-a ka nomawi chawi te kha a hlu. Europe-a nomawi chawi theih zawng zawng deuh thaw ka chawi thei a, ka zin kawng hi ka theihnghilh tawh lo ang," tiin a sawi.