Ka danglam ngai lo - Djokovic

Novak Djokovic chuan Grand Slam nomawi a chawi hnuah emaw, beisei phak lo taka a chak loh hnuah emaw a nun dan phung a tidanglam hluai ngai lem lo tih a sawi - vawiin tlai aṭanga khelh ṭan tur Wimbledon atan pawh a hranpaa inbuatsaihna danglam a nei hran lo.

Serbian star hian tun season Wimbledon-a a match hmasa ber atan zanin dar 6:00 hian Pedro Cachin a hmachhawn dawn. Centre Court-ah an inkhel dawn a, match hmasa lam an zawh dan a zirin an inkhelh ṭan hun hi sawn tlai hret theih a ni bawk.

French Open nomawi a chawi chiah khan Djokovic hian Grand Slam title 23 a nei tling a, inelna liana champion hnem lamah Rafael Nadal a kalsan chiah - Wimbledon title a la leh thei a nih chuan grass court bika champion hnem lamah Roger Federer a nih rual ang.

World number 2 Djokovic chuan, "Ka nunphung hi ka thlak danglam hluai ngai lem lo, tournament ka khelh dawn hian ka theihtawpa ṭhain inbuatsaihna ka nei ṭhin, hei hian rilru leh taksa pawh a huam nghal vek.

"Grand Slam a nih chuan a hautak deuh ṭhin, mahse nun phung thlak phah nan erawh ka hmang ngai lem lo. Helhhawlh avanga mut theih loh, thil ei theih loh leh nunphung bahlah ang hian ka awm ngai lo," tiin a sawi.

Djokovic hi kum 36 mi a ni tawh a, a vanglai a pel deuh tawh dawn emaw tih hnuah pawh khawvel player hlauhawm bera chhal theih a la ni. Wimbledon hi a inkhelh thiamna hmun, nomawi pawh kawl mektu a ni - player dang tan hmachhawn a châkawm loh ang.