Milan-ah Ruben Loftus-Cheek a kal

AC Milan chuan Chelsea aṭangin midfielder Ruben Loftus-Cheek an lei a, kum li chhung atan contract an ziahpui.

Premier League club leh Serie A club hian player man zat hi an tarlang lo ve ve, mahse, khawthlang chanchinbu mite chuan pound maktaduai 15 man niin an sawi a, a khelh ṭhat dan a zirin pung chho leh thei tur a ni ang.

Kum 27 mi Loftus-Cheek hi youth player a nih lai aṭanga Chelsea tana khel tawh a ni a, a tan chuan Stamford Bridge hi a hlu. Mahse, match 155 a khelhsak tawh club hi tunah chuan a mangṭha a ngai ta a ni.

Chelsea chuan an academy chhuak hi thlahin, "Ruben hi player ṭha a ni a, khelmual chhung bakah a pawn lamah pawh ṭhian kawm nuam leh mi ṭha tak a ni. Club tana a sulhnu hnutchhiahte avangin lawmthu kan sawi, a kal lehzelna turah duhsakna kan hlan," an ti.

England tana match 10 khel tawhtu Ruben Loftus-Cheek hian Chelsea tan Premier League nomawi pahnih, Europa League leh UEFA Super Cup te a chawi hman a ni.