MATA promotional tour a hlawhtling

Mizoram Amateur Taekwondo Association (MATA) chuan June 28-30, 2023 chhung khan Mizoram chhim lam district pali Hnahthial, Siaha, Lawngtlai leh Lunglei te an tlawh kual.

MATA hian June 28, Nilaini khan Hnathial District an tlawh a, Hnathialah Taekwondo zirna kalpui dan tur an ruahman. Ruahmanna hi Hnathial DATA secertary Vanlalrema kaihhruaina hnuaiah an nei a, HDATA president ni lai thi ta PC Vanlalrema sunna leh ralna hun hman a ni bawk.

June 29, Ningani khan MATA palaite chuan Siaha leh Lawngtlai te an tlawh zui leh a ni. Chawhma lamah Siaha DATA president A.Thazi kaihruainain District Association hmalakna tur hrang hrangte an sawi ho a, Siaha Taekwondo Academy an tlawh nghal bawk.

Chawhnu lamah Lawngtlaiah Lawngtlai DATA te nen meeting an nei leh a, Taekwondo Dojang (Zirna hmun) tih changtlun dan turte Lawngtlai DATA vice president Lalhmachhuana'n a sawi. LADC chairman VL Hmuaka'n a hmanpui a, Colour Belt exam neih nghal a ni a, zirlai 12 ten ṭha takin exam an paltlang.

June 30, Inrinni khan Lunglei DATA hruaitu Lalthansanga kaihhruainain District Sports & Youth Hall-ah district taekwondo hmasawn dan tur sawi ho leh a ni. Taekwondo training te en ho a ni a, district mamawh hrang hrangte tihhlawhtin dan turte MATA hruaitute nen an sawi ho nghal bawk.

MATA Promotional Tour-ah hian master VL Sawma (Senior Vice President), master Joseph Thansanga (General Secretary), technical board member Albert Lalrinfela leh Lianthangpuii te an kal a. District hrang hrang aṭanga player ṭha an chhinchhiahte chu Mizoram Senior leh Cadet team atan remchang hmasa bera kohkhawm an tum a ni.