Juventus player thar Timothy Weah

Liberia player ropui George Weah-a fapa Timothy Weah chuan French club Lille aṭangin Juventus a zawm a, a man zat hi tarlan ni lem lo mah se euro maktaduai 12 vel nia ngaih niin, kum nga chhung atan contract a ziak nia tarlan a ni bawk.

Kum 23 mi Weah hi winger niin, a pa George Weah chu Liberia President ni mah se a pianna USA tana khelh thlangin, international football-ah US tan hian match 31 khel tawhin, goal li a khung a ni.

Timothy Weah hian Paris St-Germain aṭanga a professional zinkawng zawh ṭanin, match ruk chiah a khelhsak hman a, goal hnih a khung. Scottish Premiership club Celtic-ah 2018-19 season kha loan-a hun hmangin, 2019 khan €10mtd-in Lille a zawm.

Ligue 1 club tan hian inelna hrang hrangah match 107 khelhsakin, goal riat a khung a, assist vawi riat a nei bawk. Season hman zawh takah khan Lille tan match 32 khelin goal a khung lo a, assist vawi hnih a nei thung.

World Cup 2022 khelh zawh takah khan Weah hi US tan player pawimawh niin, group stage-a Wales nen 1-1 a an inhnehtawkna inkhelah khan goal a khung hial.

Mahse, Timothy hian a pa sulhnu chhui tur erawhin hmabak a la ngah hle. George Weah kha a vanglaiin Juve hmelma kumhlun AC Milan tan a khel a, African Footballer of the Year-ah vawi thum thlan niin, kum 1995 khan Ballon d'Or a dawng hial.