Inter Milan-in Thuram an lalut

Champions League 2023 finalist Inter Milan chuan France forward Marcus Thuram chu forward-in an lalut. Kum 25 mi Thuram hian season li chhung a khelhna Bundesliga club Borussia Monchengladbach tan a contract a pawtsei lo a, season tharah chuan Serie A club tan a khel ang.

Thuram chuan, "Ka naupan laiin Serie A ka en ṭhin a, champion tam tak ka hmu. He league hi ka hriat chian em avangin ka tan chuan mahni ina haw ang mai ka ni," tiin a sawi. Inter forward thar Thuram-a pa Lilian hi World Cup 1998-a France champion puitu kha a ni.

Lilian hian kum 2001 leh 2006 chhung khan Juventus tan a khel a, chutihrualin Marcus hi kum 1998-a Parma tana a khelh laiin a piang. Marcus chuan, "Ka pa khelh lai nen khan Italian league hi a inthlak nasa hle. Ka pa hian thurawn ṭhahnem tak min pe a, nuam tia khel turin min hrilh," tiin a sawi.

Thuram hian kum 2020 khan France tan a khel ṭan a, ram tan match 10 a khel tawh. Nikum kum tawp khan Qatar World Cup-ah France tan a inlan a, bench aṭangin final-ah a lut. French forward hian a chhuahsan tak Monchengladbach tan match 32 khelin goal 16 a khung sak a, assist vawi sarih a nei bawk.