Foxes-in Coady leh Winks an lalut

Premier League aṭanga tlahniam Leicester City chuan England international pahnih Conor Coady leh Harry Winks te an lalut a, kum thum daih ve ve contract an ziahpui.

Kum 30 mi Coady hian Wolverhampton Wanderers tana kum riat a khelh hnuah Foxes a pan a, kum 27 mi Winks hian Tottenham Hotspur aṭangin King Power Stadium hi a pan ve bawk.

Player pahnih hi England tan vawi 10 an khel ve ve tawh a, an man zat hi puanzar chiah ni lo mah se Winks-a man hi pound maktaduai 10 vel tura ngaih niin Coady hi pound maktaduai 8.5 bawr vela ngaih a ni thung.

Coady leh Winks te hi England international ni mah se an club-ah hmun pawimawh an chang pha tawh lo. Season liam ta khan Coady hian loan hmangin Everton a pan a, Winks pawhin loan hmang bawkin Italian club Sampdoria tan a khel a ni.

English defender Coady chuan, "Leicester City tana khelh hi a châkawm a, thutlukna siam harsa a ni lo," tiin a sawi.

Foxes chhuanvawr James Maddison-a'n pound maktaduai 40-in Tottenham a pan a, Winks-a'n a hmun ruak hi a luah ang. Winks chuan, "Club thara chona thar hmachhawn a châkawm a, mimal ang pawhin chona thar a ni," tiin a sawi.

Winks hi kum nga mi a nihin Spurs-ah a awm ṭan a, kum 2014 khan khel ṭanin match 203 a khel tawh. Premier League bikah Winks hian match 128 a khel a, Liverpool nen 2019 Champions League final an khelh ṭumin bul a ṭan. Chutihrualin kum 2020 hnu lamah club tana a pawimawhna a tlahniam a, a club zawm hi Premier League champion tawh ni mah se an khelhna tur hi Championship a ni thung.