Srikanth a tla hma

India tlangval badminton khel thiam Kidambi Srikanth tan season duhawm a ni dawn lo a ni mai thei. Inelna a hmachhawn tawh pahnihah hneh nei loin a tla ve ve.

Nimin khan Indonesia Masters 500 tournament-ah Srikanth hi a inlan a, a match hmasa berah Shesar Hiren Rhustavito nen intawngin darkar khat leh minute thum an inkhelh hnuah 21-18, 12-21, 14-21 in a chak lo.

Kar hmasa mai khan Malaysian Masters lamah Srikanth hi a lo chak lo nghal tawh bawk, season hmasa a hmang ṭha lo a; kuminah beiseina nei sang ve mah se a duh ang result erawh a la nei thei ta chuang lo a ni. Inelna neih laiah hian nimin khan mixed doubles pawh khelh nghal a ni. Pranaav Jerry Chopra leh Sikki Reddy te ṭangdun pawh an chak lo nghal.  Korean player Ko Sung Hyun leh Eom Hye Won te ṭangdun chu 8-21, 14-21 in an hneh lo.