A hun a thleng ta - India an 'treble' dawn?

SAFF Championship 2023 final chu zanin dar 7:30 hian khelh a ni dawn a, Kuwait leh India ten champion an inchuh dawn - Indian football ngainatute chuan Bengaluru khawpui lam an hawi dawn e.

Final khelhna tur Sree Kanteerava Stadium-ah mipui 25,810 an leng a, nimin khan ticket hi an hralh zo deuhthaw tawh - West Block stand bik phei chu ticket zawrh a nih aṭanga darkar hnih chhungin an hralh zo vek!

Mipui tamna India-ah football-in ngaihven a hlawh deuh deuh a, sum a tam tawlh tawlh bawk - chutiang boruak karah chuan player langsar bik Lallianzuala Chhangte a awm a, Mizo forward hi India jersey hain a inlan ṭhin.

ISL hero of the league ni lai hi zaninah pawh inlan tura beisei a ni a, Mizo tlangvalin India a champion pui thei dawn em, tih chu zawhna a ni mek.

An ṭha si!

Group Stage lamah team pahnih hi an lo intawng tawh a, inkhel hmuhnawm takah 1-1 in an inhnehtawk - Kuwait hi ranking lamah hniam rih mah se, tun hnaiah an insiamṭha nasa a, India tan hmachhawn an awlsam dawn lo.

Lianzuala chuan, "Lebanon ai pawhin hmachhawn an harsa zawkin ka ring. An ranking thlir chuan hniam tak angin an lang a, mahse, an ṭha khawp mai," tiin Vanglaini a hrilh a, Kuwait a dah hniam lo.

Kuwait hian kum 2023-ah match 11 an khel tawh a, vawi khat chiah an la tlawm - vawi hnih an inhnehtawk a, an hneh zingah Asian team ṭha United Arab Emirates an tel a, Tajikistan leh Zambia an hnehte pawh team ṭha tak an ni.

India leh Kuwait hi vawi li an intawng tawh a, Blue Tigers hi vawi khat chiah la chak vein, Kuwait hi vawi hnih an chak a, vawi khat an inhnehtawk - Kuwait hian an chak ṭum hian India hi 6-1 leh 9-1 in an sawp a, an ngam hle!

Beiseina neitu

November 2004 khan international friendly match-ah India hian 3-2 in Kuwait hi an hneh a, Jerry Zirsanga chuan kum 16 leh ni 311 mi niin goal a khung - Blue Tigers tana goal khung thei naupang ber record a siam.

Kum 2023 a her chhuak leh a, Mizo tlangvalin Kuwait a hmachhawn ve leh dawn - tun ṭum erawh Lallianzuala Chhangte a ni a, international friendly match mai ni loin SAFF Championship final a ni ta bawk.

Lianzuala chuan, "Kan game ruahman anga kan khelh theih chuan kan hneh theih mai ka ring. Kuwait khelh harsa ka ti a, mahse, a hma aiin kan khel ṭha tawh ang," tiin Vanglaini a hrilh a, a inringtawk hle.

Mizo forward hian Sunil Chhetri leh Ashique Kuruniyan te nen inkawpin tlarhmaah a inlan leh tura beisei a ni a, a tlan chakna, ball thiamna leh chet ranna chu Kuwait tan buaipui tham a tling leh ang.

Champion a ngai

Semifinal-a Lebanon nen an intawn ṭumin Lianzuala'n minute 120 a khel tluan a, mahse, Lunglei tlangval tan 'hah' sawi hman a ni lo a, champion ngeia Mizorama chawlh hman a duh - chumi tur chuan vawi khat chak chiah a tawk ta.

Lianzuala chuan, "Theihtawp chhuah turin ka inpeih a, champion ngeia rawn haw ka duh a ni. India tana treble champion nih pawh a châkawm alawm," a ti a, kuminah Blue Tigers tana nomawi pathum chawi a tum.

India hian kumtir lam khan Hero Tri-nation series-ah champion nomawi an chawi a, Player of the Tournament-ah Lianzuala thlan a ni a, Hero Intecontinental Cup-ah June thla khan champion zuiin, final-ah hero of the match atan thlan a ni.

Blue Tigers-in SAFF final an hmabak leh ta a, an champion chuan kuminah nomawi pathum an chawi dawn tihna a ni - football ram ṭha ni tura ṭhang mek India tan kum dang zawnga SAFF Championship aiin a hlu lehzual ang.

Thlir ila

Kuwait tan tlarhmaah Mobarak Al-Faneeni chu ven bik ngai a ni leh dawn a, a chet ranna, tlan chakna leh ball thiamna chu India tlarhnung tan ven uluk a ṭul dawn. Blue Tigers tan hian tlarhnungah Nikhil Poojary, Sandesh Jhingan, Anwar Ali leh Akash Mishra te an pawimawh leh ang.

India hi coach Igor Stimac-a'n a hremna an hlip thut a nih loh chuan a la ho thei dawn lo a, assistant coach Mahesh Gawli hoin an inlan leh ang.

Kuwait hian an nawr na nia a lan chuan centre back-te pui turin Jeakson Singh chuan tlarhnungah a hun tam zawk a hmang lehin a rinawm a, Anirudh Thapa-a'n midfield-ah zalenna zau zawk a neih phah leh thung ang.

Chhetri-a hnung chiahah Sahal Abdul Samad chu ding leh tura beisei a ni a, Kuwait defensive midfielder Sultan Al Enezi tan hna hlen ṭhat a ṭul dawn - a tawi zawnga sawi chuan, zaninah inkhel hmuhnawm beisei a sual lo ang.