Wimbledon atan Alcaraz a inpeih

Tennis tournament upa ber Wimbledon khel turin Carlos Alcaraz a inpeih. World number 1 leh seeded pakhatna ni bawk Alcaraz hian a match hmasa ber atan vawiin tlai dar 3:30 hian Jeremy Chardy a hmachhawn ang.

Kum 20 mi Alcaraz hian grass court-ah sulhnu chhuan tur a nei tam lo, kar hmasa khan Queen’s Club Tennis Championship-ah a inlan a, a champion - grass bikah tournament vawi thum a khelhna chauh a ni.

Season hmasa Wimbledon-ah khan fourth round a thleng, Italian rawlthar Jannik Sinner ngam loin a zinkawng a tawp. A hnu lamah erawh tennis khawvel hriat a hlawh a, number 1 hial ni theiin Novak Djokovic el phak bertu a ni hial.

Alcaraz chuan, "Wimbledon khel turin ka inpeih, inrintawkna sang tak nen London khawpui ka pan. Queen’s Club lama ka khelh dan khan inrintawkna ka neihsa pawh nasa takin min tihpunsak.

"Result ṭha tak neih theih ka beisei a, beiseina pawh a sang ve hle. Player dangte hmachhawn turin ka inpeih, midang pawh an inpeih ang. Novak Djokovic tum tur pawhin ka inpeih bawk," a ti a, champion tura rinkai ber chu Djokovic a nih thu a sawi bawk a ni.

Djokovic nen hian French Open semifinal-ah khan an intawng a, tawnhriat nei ṭha zawk Djokovic a chak. Serbian star hian nizan khan Wimbledon 2023 atana a match hmasa ber a khel a, result erawh kan hre hman lo.

Wimbledon atan seeded pakhatna a nih avangin Alcaraz hian final hma chuan Djokovic hi a hmachhawn thei dawn lo. A kaltluang a nih chuan fourth round-ah Alexander Zverev emaw Alex de Minaur emaw a hmachhawn thei dawn.

Spanish tlangval Alcaraz chuan, "Tournament ka khelh dawn hian champion leh champion loh chungchang zawhna ka dawng ve ta fo mai a, ka chhanna chu a ngai reng a ni. Inelna ka hmachhawn a nih chuan champion ngei ka tum ṭhin.

"Nomawi chawi tur erawh chuan a ṭha thei ang bera ka khelh a ngai. Grass-ah hian thil a danglam dawn, ball vuak nat, net bula tlan hma leh rang taka chet zung zungte a pawimawh dawn hle," a ti.

Hard court-ah chuan Alcaraz hian a inkhel thiam tih a finfiah tawh, season hmasa khan US Open nomawi a chawi. Clay court pawh a inkhelh nuam tihna leh thiam berna hmun a ni, a tan chuan kumin Wimbledon hi fiahna langsar tak a ni dawn chiang hle.

Roger Federer a chawl tawh a, hliam vangin Rafael Nadal a inkhel thei lo bawk. Tun dinhmunah chuan Grand Slam vawi 23 champion tawh Djokovic a chungnung hle a, player chhuak thar Alcaraz hian Serbian star hi tennis inelna hmuhnawm a chhawpchhuah pui thei ang em, tih chu khawvel hriat châk a ni.

Zanina inkhel tur zingah Alexander Zverev leh Daniil Medvedev te an tel a, anni pahnih hi chuan player langsar tak an la hmachhawn dawn rih loh avangin harsa vak loa an tlang mai a rinawm.

Seeded pangana Stefanos Tsitsipas tan erawh chetsual theih a ni. Greek tlangval hian Dominic Thiem a hmachhawn dawn - Austrian player hian hliam a tawrh hnuah ngai la awh leh lo mah se, tun hma lama US Open nomawi chawi thei a nih avangin theihna a nei sang tih a chiang.

Vawiin Inkhel Tur Langsar

Alexander Zverev vs Gijs Brouwer

Ryan Peniston vs Andy Murray

Dominic Thiem vs Stefanos Tsitsipas

George Loffhagen vs Holger Rune

Daniil Medvedev vs Arthur Fery

Frances Tiafoe vs Wu Yibing

Carlos Alcaraz vs Jeremy Chardy

Shintaro Mochizuki vs Tommy Paul

Note: Match hmasa ber hi tlai dar 3:30-ah an ṭan ang, a zawh hma dan a zirin a hnuhnung khelh hun a danglam thei.