Newcastle-in €70m-in Tonali an lalut

Newcastle United chuan nimin khan Sandro Tonali chu AC Milan aṭangin euro maktaduai 70-in an lalut a, Milan player hralh to ber a ni. Italian defensive midfielder ṭha Tonali hian June 2029 thleng daih contract a ziak.

Magpies hian Tonali hi an hralh a nih chuan Milan hian 10% an chang dawn a, AC Milan player hralh to ber a nih bakah Italian player man to ber a ni bawk.

€70m man Tonali

Kum 23 mi Tonali hi Brescia aṭanga inzir chhuak a ni a, kum 2019 aṭangin AC Milan tan khel ṭanin 2021-22 season-a Scudetto an chawina kawngah player pawimawh a ni.

Tonali hian Serie A-a a season hnuhnung pahnihah match 70 a khel thei a, ram tan vawi 14 a khel tawh a, Champions League-ah pawh tawnhriat a nei tawh.

Under-21 European Championship neih mekah Italy tan Tonali hi a captain a, group stage an paltlang lo. Inelna an zawh hma zarah Tonali leh Newcastle te hian contract an ziah hma theih phah.

Magpies defensive midfielder thar Tonali chuan, "Club-in min rinna hi khelmualah a chhanletna lantir ka duh. Ka tih ṭhin dan angin ka theihna zawng zawng ka chhuah dawn. St. James' Park-a inkhelh hun ka nghakhlel a, fan-te hmaa inkhelh ka châk tawh hle," tiin a sawi.

Talent nei ṭha bik

Newcastle United manager Eddie Howe chuan Sandro Tonali hi talent nei ṭha bik a nih thu a sawi. Howe chuan, "Talent nei ṭha bik a ni a; rilru, taksa leh a theihnate hi kan ṭangkaipui khawp ang. Kum 23 mi lek ni chung siin Serie A leh Champions League-ah a khelhna club tan player pawimawh a ni pha," tiin a fak hle.

Magpies hian season tharah Champions League an khelh dawn avangin Tonali tawnhriat hi a pawimawh dawn. Italian midfielder hian kum 17 mi a nihin Serie B club Brescia tan professional match a khel ṭan a, kum ruk hnuah Premier League-ah a theihna fiahin a awm ang.