A hming chu Szoboszlai : A khelhna tur Liverpool

Pathianni zan khan Liverpool fan-ten YouTube lamah, "How to..." tih an chhu nasa an ti - a chhan maw? Hungarian attacking midfielder Dominik Szoboszlai an lakluh vang a ni a, he player hming lam har tak hming lam dan hi fans tam tak tan chuan zawn chawp a ngai tlat!

Liverpool hian Szoboszlai hi RB Leipzig aṭangin pound maktaduai 60-in an lalut a, kum nga chhung atan contract an ziahpui. Season hmasaa an buaina midfield-ah buai nawn an tum tawh lo.

Reds hian Brighton & Hove Albion aṭangin midfielder Alexis Mac Allister chu £35mtd-in an lalut tawh bawk a, season tharah Champions League khel dawn lo mah se Reds-in season nuai liam mai mai an tum lo tih an pholang.

Szoboszlai chuan, "Club ropui tak, player leh coach ṭha tak nei an ni a, ka tan chuan hmasawn zelna tura duhthusam a ni. Fans, stadium, engkim mai hi a ṭha êm êm vek ringawt mai a ni," a ti a, Anfield club a pan thei chu a lawm hle.

Hei le number 8

Steven Gerrard-a'n Liverpool-ah number 8 a ha ṭhin a, player ropui jersey number hak hnu hi Naby Keita kha haktir ni mah se Stevie G sulhnu a chhui zo lo hle - Reds hian mawi taka number 8 ha tur an zawng a, a tirah Mac Allister tan an dah niin an sawi.

Mahse, World Cup-a Argentina champion puitu midfielder hian Stevie G-a hak hnu meuh hak chu a tan sang lutukah ngaiin, a pha nia sawi a ni a, Reds-in Szoboszlai an lakluh hnuah Hungarian midfielder hi lawm takin an hlan.

Szoboszlai hian a banah Stevie G thusawi nia an sawi chu a chhu a, "Talent hi Pathian malsawmna a ni a, mahse, tumruhna leh inngaihtlawmna tel lo chuan engmah lo mai a ni," tih a ni.

Kum 22 mi midfielder chuan, "Number 8 hi player ropui tak takin an lo ha tawh a, Steven Gerrard-a thusawi hi tattoo-ah ka nei bawk - hei vangte pawh hi a ni tel," a ti a, Stevie G hak hnu number chu a ngaihhlut thu a sawi.

Hmelma ata ṭhian ṭha

Liverpool hi rei tak chhung chu Jude Bellingham nen sawizawm an ni a, mahse, English midfielder lalut tura sum sen hnem a ngaih avangin an inhnukdawk - Reds hian tu lam nge an hawi ang aw, tih laiin an ri phut a, kum 24 mi Mac Allister hnuah kum 22 mi Szoboszlai an lalut leh ta.

Reds-in player pahnih an rim rei thu hre lo mah ila, phur thut thil ti an ni lo - an lo enthla reng tawh. Szoboszlai pawh hi Jurgen Klopp leh a thawhpuite chuan an lo thlithlai reng tawh a, Klopp hian Germany lama a ṭhiante leh thawhpui hluite aṭangin Szoboszlai chanchin hi a ngaihven reng tih an sawi.

Klopp chuan, "Dominik hi kan elpui angin kan lo hmelhriat tawh a, RB Salzburg tana a khelh lai khan kan lo hmachhawn tawh a ni. Kha inkhel en kha chuan, khatilai pawh khan theihna sang tak a nei tih an hre daih tawh ang," a ti.

Liverpool leh RB Salzburg hi Champions League 2019-ah khan an lo inhmachhawn tawh a, 4-3 leh 2-0 in Reds hi an chak - tunah chuan kha player naupang kha Liverpool midfielder a ni dawn ta.

Tun leh nakin

Szoboszlai hi kum 22 lek ni mah se ram tan match 32 a inlan der tawh a, goal sarih a khung bawk. Hei chauh a ni lo - kum naupangtêin Hungary captain a ni der tawh a, an ram under-17 leh U19 tan pawh Captain armband a lo hreng tawh ṭhin.

Klopp chuan, "Szoboszlai kan tawn hmasak ber khan kum 20 pawh a la tling kher lo ang. Mahse, khami hnuah khan nasa takin hma a sawn a, Leipzig lamah pemin Bundesliga lamah a tlangnel nghal êm êm.

"Hungary tan a khel a, kum naupang tak ni chungin an ram captain a ni thei a ni," a ti a, midfielder ni mai lo a, hruaitu ṭha tak an lalut tel chu a lawm thu a sawi.

Klopp chuan sawi zawmin, "Szoboszlai hi vawiin leh nakin hun atana kan lakluh a ni a, ani lalut tura thawhrimna hi fak loh theih a ni lo," a ti a, Hungarian midfielder hi rei tak Anfield-a cham turin a beisei - number 8 ha chungin captain armband a la hreng lo ang, tih tu nge sawi thei?

Champion player

Szoboszlai hian a professional career-ah kum tin champion nomawi a la chawi ziah a, Liverpool-ah a chhunzawm thei ang em, tih chu zawhna awm a ni a, amah chuan a beisei!

Winger ang pawha chhawr theih Szoboszlai chuan, "Ka professional career-ah kum tinin champion nomawi ka la chawi ziah a, Liverpool-ah he record hi ka chhunzawm theih ka beisei," a ti a, Reds-ah champion tura kal a nih thu a sawi.

Gerrard-a number hak hlui ha tur Szoboszlai chuan, "A nihna takah chuan kan naupan laiin inkhel ka en vak ngai lo. Mahse, Champions League emaw game boruak sang kan en chuan Liverpool leh club lian dang tam tak inkhel ka en ṭhin.

"Player langsar tak takte inkhel pawh ka en ṭhin a, chung zingah chuan Stevie G chu player langsar ber pawl a ni ṭhin," a ti a, Anfield legend sulhnu chhui a tum.

£60mtd man?

Kum 22 chauh a la ni a, hmabak a la ngah hle - heti chung hian tawnhriat erawh a ngah viau lawi a, zawhna langsar tak chu he Hungarian midfielder hian £60mtd-a lei hi a phu reng em, tih a ni a, number 8 hi a dinchhuah pui ang em, tih a ni bawk.

A chhanna chu nakina la pek tur chauh a ni ang a, tun dinhmuna kan thlir theih chin aṭanga teh erawh chuan Reds hian £60mtd 'lek' a an chang thei hi an lawm khawpin a rinawm - Szoboszlai hi Leipzig-a a contract-ah £60mtd-a a chhuah theih thu hi a inziak.

Zirtawpni khan a release clause hi a thi a, mahse, a thih hma hian Reds hian an dawr hman a ni - Szoboszlai hian season hman zawh takah khan inelna hrang hrangah match 46 khelin goal 10 a khung a, assist vawi 13 a nei bawk.

Szoboszlai hian Leipzig tan season hnih a khel hman a, match 91-ah goal 20 khungin, assist vawi 22 a nei. DFB-Pokal nomawi vawi hnih a chawi a, season hman zawh tak final-a Eintracht Frankfurt (2-0) an hnehna inkhelah goal a khung.