National Aquatic C'ship-ah Mizo tleirawl panga

76th Senior National Aquatic Championship chu Hyderabad-ah July 2, Pathianni aṭang khan ṭan a ni a, July 5, Nilaini thleng a awh ang. India ram pum huap inelnaah hian Aquatics Association of Mizoram chuan swimmer panga Phoebe Rohluzuali (Zotlang), Lalrinpuii (Chawnpui), Gabby Lalawmpuii (Republic Veng), Ruth Lalruatfeli (Durtlang) leh Catherine Lalremsiami (Mission Veng) te an tir.

50m Butterfly-ah July 2 khan Phoebe Rohluzuali'n a hleuh a, July 3 khan Lalrinpuii Fanai leh Phoebe Rohluzuali ten 50m Breaststroke an hleuh a, an heat bikah Mizo tleirawlte hi pakhatna leh pahnihna niin Bihar leh J&K swimmer ten an pha lo. Amaherawhchu heat danga swimmer-te an hleuh chak avangin final round erawh an lut pha lo.

Vawiin hian Gabby Lalawmpuii'n 50m backstroke-a hleuh ang a, Ruth Lalruatfeli leh Catherine Lalremsiami ten 50m freestyle an hleuh bawk dawn a ni. Mizoram aiawhte hi manager Sangṭhuama Hlondo (AAM vice president) leh coach Albert Malsawmkima ten an hruai a ni.