Rajasthan FC zawmtu Mizo pathum

I League club Rajasthan FC chuan season thar atan Mizo pathum HP Lalremruata, Lalbiakzuala (BTea) leh C. Lalchungnunga te an lalut a, Lengpui tlangval F. Lalremsanga leh Kolasib tlangval Vanlalzahawma te an awm sa bawk.

Serkawn, Lunglei tlangval HP Lalremruata hian MPL club Electric Veng FC tan te a lo khel tawh ṭhin a, hemi hnu hian Goa reserve team tan khelin season liam ta khan senior team squad-ah a tel. Midfielder HP-a hian khelhna hun chan tam zawk beiseiin ISL club aṭangin I League club hi a zawm a ni.

Thingsulthliah tlangval BTea hi season liam ta khan Aizawl FC left back a ni a, chona thar hmachhawn turin Desert Warriors hi a zawm. BTea chuan, "Rajasthan coach-in min bia a, min duh thu min rawn hrilh avangin AFC chhuahsan turin thutlukna ka siam. Season hnih chhung contract ka ziak," tiin Vanglaini a hrilh.

Zotuitlang tlangval Chunga hian loan hmangin ISL club Hyderabad aṭangin loan hmangin Rajasthan FC hi a zawm. Ball thiam vanga naupan lai aṭanga lar Chunga hi India sub junior tan a khel tawh a, Hoffenheim-ah training a neih hnuin MPL club Chhinga Veng tan a khel. Hemi hnu hian Hyderabad reserve team a zawm a, senior team-ah kai chho tawhin season liam ta khan ISL-ah vawi hnih a inlan. Chunga tan I League club-a khelh hi intahhriamna ṭha tak a ni ang.