Canada Open-ah Sindhu leh Lakshya Sen

Badminton inelna Canada Open-ah PV Sindhu leh Lakshya Sen ta an inlan dawn - Indian player pahnih hian season an hmang ṭha lo hle, an tan tunkar chhunga inelna neih tur hi insiamṭhatna hun remchang a ni ang.

Hliam na tak a tawrh hnuah Sindhu hian ngai a la awh leh rih lo, tun hma lama world number 1 dinhmun hial pawh lo luah tawhtu hi tunah chuan number 12 a ni daih tawh - a match hmasa berah tualchhung nula Talia NG a hmachhawn dawn a ni.

Kumin chhungin Sindhu-i'n tournament a khelh ṭhat ber chu Madrid Masters a ni a - April thlaa inelna neihah khan silver medal a la. A hnu lamah chuan hneh nei loin vawi hnih a tla a, inelna dangah vawi khat chak chungin a tla zui bawk.

Mipa singles lamah Commonwealth Games champion Lakshya Sen pawhin insiam thar a tum ang, tournament pali ngawtah hneh nei loin a tla tawh a ni a, a tan tun ṭum hi chona lian tak a ni dawn.

Indian tlangval hi nikum August thlaa khelh zawh tak World Championship hnu khan a hnar zai a ni a, a hnu lamah damlo zui lehin thla riat chhung chu beisei ang result a nei thei tawh lo - Thailand player Kunlavut Vitidsarn nen an intum ang.