City-in Mane la se ka ti - Toure

Yaya Toure chuan Man-chester City tana a khelh laiin Sadio Mane chu Southampton aṭanga la tura a ngen thu a sawi. Senegal forward Mane hian Liverpool a zawm hma khan Saints tan 2014-2016 chhung khelin league match 67 aṭangin goal 21 a khung.

Mane hian pound maktaduai 34-in Liverpool a zawm a, Jurgen Klopp-a hnuaiah 2019 Champions League leh Premier League (2019-20) nomawi an chawi a, player pawimawh a ni ve ve.

Toure chuan, "Mane khelhpui kha ka châk ṭhin. City tana ka khelh lai khan Mane hi Southampton-ah a awm a, a ṭhat em avangin club thuneitute hnenah la turin ka ngen. Ka duh ang a thleng ta lo.

"Hemi hnu hian Klopp-a'n Mane ṭhatna hmuin Liverpool-ah a senglut a, a che ṭha takzet. Player a nihna angin Mane hi ka duh zawng tak a ni," tiin a sawi.

Mane hian Reds tan match 269 khelin goal 120 a khung a, Anfield-ah nomawi paruk a chawi hnuin June 2022 khan pound maktaduai 35-in Bayern Munich a pan. Germany-ah Mane hi che ṭha tawk lo mah se khelmual pawn leh chhungah sulhnu a nei ṭha hle.

March 2020 khan Mane hian an ram Senegal-a Covid-19 do nan £41,000 a thawh. Champions League final 2018-a Real Madrid nen an inkhelh hma khan an ramah an inkhelh laia hak turin Liverpool jersey 300 a thawn bawk. Toure hian khelmual pawn lama Mane chet dan hi a fak hle bawk.