A zawna vawi nga chak Max Verstappen
Formula 1 champion lai Max Verstappen chuan a nomawi humhim ngei tumin hmalam a pan zel a, tun hnai intlansiak hnuhnung pangaah a chak fai vek - Pathianni zana tlan zawh tak Austrian Grand Prix-ah hnehna a chang leh a ni.
Red Bull driver hian tun season intlansiak vawi kua an neih tawh aṭangin point 229 a hmu, amah hnaih bertu leh a teammate ni bawk Sergio Perez aiin point 81 ngawtin a sang fal tawh - a vawi thum nan a champion leh mai pawh a rinawm.
Dutch tlangval Verstappen hnuah dawhsana lawn phak nih tumin na takin an inum a, team ṭha Ferrari car khalhtu Charles Leclerc chu thlengin pathumna chu Perez a ni thung - Mercedes driver pahnih ten podium an lawn ve phak lo.
Intlansiak an neih ni hian F1 thuneitu lam chuan Red Bull Ring-ah hian kum 2030 thleng inelna nei tura inremna an siam thu an puang, kumin tir lamah mai khan kum 2027 thleng an lo inrem tawh - hun rei zawk atan thu an titlu leh hma hle a ni.
Max a chungnung
Verstappen hi kum 25 mi chauh a la ni a, tuna a lan dan chuan Formula 1 hi rei tak a thunun theiin a rinawm. Car intlansiakna sang berah hian vawi 42 ngawt a chak tling ta, driver ropui dangte la hlat deuh mah se a kum a la tam loh avangin sulhnu hnutchhiah theih tur a la ngah.
Red Bull boss Christian Horner chuan, "Engkim mai kha a fuh vel vek. Max-a kha a che mawiin a turu hle a, tihsual engmah nei loin a chak thei. Red Bull car kha a chak ṭhain a ropui ka ti takzet bawk," tiin an driver leh car neihah a lungawi tih a sawi.
A vawi thum nana champion turin Verstappen dinhmun a ṭha viau, mahse a la ṭawng fimkhur hle thung. Verstappen chuan, "Intlansiak vawi khat chauh a ni lo a, kartawpa kan hun hman hi a tam hle, chuvangin mimal ni loin team thawhrim rah a ni tih ka hria," a ti.
El phak loh
Tun season intlansiak awm tawh zawng zawngah Red Bull an la chak fai vek - Max Verstappen a chak lohna pahnihah pawh a teammate Sergio Perez a chak ve ve a, team dang tan hmun an kian miah lo; kuminah midang chungah fal takin an leng.
Ferrari driver Leclerc chuan, "Motor ke kan thlan a fuh ṭum pawhin kan um phak lo a, an thlang sual deuh emaw tih pawhin chak takin an tlan thei zel. Zep tur a awm lo, tun dinhmunah chuan Max hi tumahin kan el phak lo.
"Kawng kawiah hun kan hman tlen hret pawhin kan hnaih hleithei lo, an car a chak bik êm êm a ni," a ti. Season hmasa khan Lewis Hamilton pawhin Mecedes car aiin Red Bull car chu a chak tih a lo sawi chhuak ve tawh bawk.
Pariatna Hamilton
World champion vawi sarih tehmeuh ni thei mah se, tun hnaiah Lewis Hamilton tan hun ṭha a inher chhuak thei lo. Season hmasa tluanin chak ni hmel a hmu lo a, kuminah pawh a la chak miah lo - Austrian GP an tlan lai pawhin a beisei angin thil a thleng lo.
Britain tlangval hmaah driver pasarih ngawt an thleng - McLaren driver Lando Norris bakah championship lamah a elpui Aston Martin driver Fernando Alonso te a um phak lo a, a tan nomawi chawi chauh ni loin pathumna nih phak pawh thil awlsam a ni dawn lo niin a lang.
Mercedes team boss Toto Wolff chuan, "Lewis, car a muang tih kan hria, khawngaihin tlan zel rawh," tia a fuih a ngai hial a, an elpui team car an um phak miau loh avangin team chhung boruak pawh tun hma angin a ṭha reng thei lo a ni.