Rybakina-i a inringtawk

Wimbledon hmeichhe singles champion lai Elena Rybakina chu inelna hmachhawn turin a inringtawk hle a, a vawi khat nan Grand Slam a champion tawhna hmunah nomawi humhim tumin a inlan dawn a ni.

Season hmasa khan Rybakina hian Wimbledon title a la, mahse, Russia leh Belarus player-te an tel ve phal an nih loh avangin ranking point a hmuh belh lo - season chawhnu leh kumin tir lam thlengin ranking point a neih belh loh hi a tuar.

Grand Slam-ah hian champion tan point 2000 hmuh theih a ni, player tan chuan point hmuh loh hi a pawi - tournament dang an khelh dawnah an ranking a hniam miau avangin seeded sang lo zawk an nih zel a ngaih phah a ni.

Rybakina chuan, "Nikum chu a herliam tawh a, kuminah chuan engkim a thar vek a ni tawh. A pawimawh ber chu ka team nen kan thawkho ṭha, anni hian a sang thei ang ber ka thlen theih nan min ṭanpui an duh reng," a ti.

Australian Open 2023-ah khan Rybakina hian final a lut a, mahse, nomawi inchuhna inkhelah Aryna Sabalenka a ngam lo. Player pahnih bawk hian Indian Wells nomawi an inchuh leh a, result inthlakin Rybakina a champion ve thung.

Kazakh nula Rybakina chuan, "Duhthusam ang thlap chuan inbuatsaihna ka nei ṭha tawk lo, mahse, ka hun neih ve ang chhun chu ka hmang ṭha viau chuan ka hria. A nihna takah chuan May thla pumpui kha chuan damdawi ei ka ngai.

"June thlaah chuan ka ziaawm tawh a, tun thla thlarah phei chuan ka nihna ang taka tennis ka khelh chhuah leh theih tawh ka beisei," a ti. Wimbledon inbuatsaih nan hian grass court-ah match hnih chauh a khel a ni.

World number 3 Rybakina hi seeded pathumna pek a ni a, vawiin tlai hian a match hmasa ber atan Shelby Rogers a hmachhawn ang. Player pahnihte hi grass bika an intawn hnuhnung chu 2022 kha niin American player Rogers zawk a chak - tun ṭumah chuan service nei ṭha tak Rybakina hi rinkai zawk a ni ang.