Mizoram taekwondo team zin chhuak

National Junior Taekwondo Championship vawi 40-na chu June 7-9 chhung hian Shivamogga, Karnataka-ah khelh a ni dawn, inelna hmachhawn tur Mizoram Junior team te chuan June 2, Pathianni khan Aizawl an chhuahsan.

Mizoram aiawhte hi hmeichhia pali leh mipa paruk an ni. Aizawl Taekwondo Academy, Electric Veng player panga niin TABF player pathum an awm a, Exodus School leh Lunglei SAI ten player pakhat ve ve an thawh bawk.

Kum 17 hnuai lam inelnaa kal turte hi ni 40 chhung ngawrh takin training camp an neihpui hnuah June 1, Inrinni khan Electric Veng YMA Hall-ah thlahna hun hman a ni - Mizoram team-te hi Lalinpuia Armed Veng South leh Lalsangzuali Venghlui ten an hruai a ni.