Vieira-a'n RC Strasbourg enkawl dawn

Patrick Vieira chuan an ram France-ah hna a thawk dawn, kum thum chhung atan Ligue 1 club RC Strasbourg nen inremna an ziak fel tawh - tun thla aṭangin team enkawl hna hi a thawk nghal ang.

Arsenal captain hlui hian team hrang hrang a enkawl kual tawh, kumin March thla khan Crystal Palace chuan an bân a, a hnu lamah tun ṭum hi a hna a thawh lehna tur hmasa a ni.

Kum 47 mi Vieira chuan, "Racing ka zawm thei hi ka lawm. He club hlutna leh ropuina hi ka hriatsa a ni a, club chhungkua chauh ni loin a chhehvela awm zawng zawng tan pawh an hlu, chutiang tana hna ka thawk thei tur hi ka lawm," a ti.

Vieira enkawl tur Strasbourg neitu zingah hian Chelsea neitute pawh an tel. Tun hma pawhin Vieira hian mi pahnih kuta awm club a lo enkawl tawh - Manchester City under 23 team a enkawl hnuah New York City FC a lo enkawl tawh.