Euro U21: England-in semifinal lut

European Under-21 Championship 2023 semifinal khel turin England an inpetkai a, Portugal chu 1-0 in an hneh - Newcastle United winger Anthony Gordon chuan inkhela goal awmchhun hi a khung a, a thiam pali zingah an tel.

Portugal tan Henrique Araujo chuan si phurh sutna remchang nei mah se bar a pet per a, England an ṭang tluan - Portugal hian goal khung tumin an nawr na viau a, mahse, tlarhnung lamah England an inremphui ṭhat avangin paltlang an harsat.

A tawpah England an vannei a, kum 2017 hnua a vawi khat nan semifinal an lut. July 5, Nilaini zan dar 9:30-ah Israel nen final luh an inchuh ang - Three Lions hian group stage lamah Israel hi 2-0 in an lo hneh tawh a, final an mitthla lawk a nih pawhin an demawm lo.

England hian kum 1982 leh 1984 khan Euro U21 nomawi hi an lo chawi tawh a, a hnuah an champion leh tawh lo. Three Lions hian thawnthu thar ziak turin match hnih chak chiah an bak tawh a, an tan kawng zau taka hawnin a awm tawh.

Pathianni zan semifinal inkhel dangah Ukraine chuan 3-1 in France an barakhaih a, Spain nena semifinal khel turin an inpetkai. France tan Rayan Cherki chuan goal khung hmasa mah se Ukraine hian goal thumin an chhanglet.

Ukraine tan Heorhiy Sudakov chuan minute 32-naah penalty hmangin si phurh a sut a, minute 44-naah hmahruaina goal a khung zui - football thiam zawk rama ngaih France-in an chhanglet thei lo a, Artem Bondarenko chuan minute 86-naah belhchhahin, 3-1 in Ukraine U21 an chak.

July 5, Nilaini zan dar 12:30-ah Ukraine hian semifinal an khel dawn a, quarterfinal-a 2-1 a Switzerland hnehtu Spain U21 an hmachhawn ang.