Kyrgios a inhnukdawk

Season hmasa Wimbledon finalist Nick Kyrgios chu kuminah a inlan thei dawn a, a banrek hliam vangin hun tepter tawh takah a inhnukdawk tih a puang a ni.

Grass court inelna lian hi nimin tlai aṭang khan khelh ṭan a ni. Australian tlangval hian a inlan theih loh tur thu hi Pathianni khan a puang chauh, beiseina sang tak nen khelh hram tum mah se a thei ta ngang lo.

Kum 28 mi Kyrgios chuan, "Wimbledon aṭanga inhnuhdawh a ngai mai hi hrehawm ka ti hle, grass court inelna lian hmachhawn ngei tumin theihtawp ka chhuah a, ka hliam pawh zai niin inenkawlna pawh kan uluk hle.

"Mahse, Mallorca lama inenchhinna ka neih dawn khan ball ka vuak zawngin ka banrek a la na tlat. Hun ka neih ang chhunah dam hman turin theihtawp chhuah mah ila mihringin kan tih theih tawp chin a awm," a ti.

Australian player hi kuminah a vanduai - Grand Slam pahnihna French Open kha a ke phah hliam vangin a khel thei lo, hemi ṭuma a hliam hi rukru nena an inbeihna lama hliam a ni.