Wimbledon : Hnehna nena bul ṭan Djokovic

Novak Djokovic chuan Wimbledon nomawi a kawl lai humhim ngei a tum - Serbian star hian Thawhṭanni zan khan a match hmasa ber khelin, a khingpui Pedro Cachin chu 6-3, 6-3, 7-6 (7-4) in a hneh.

Centre Court hi a chung khuhna a awm, mahse set khatna an khelh lai hian ruah sur vangin minute 80 chhung an chawlh lailawk a ngai. Harsatna awm loa an inkhelh hnuah Djokovic tan buaina tur lian tham a awm lo - Wimbledon bikah a zawnin match 29 a chak tling ta chiah.

World number 2 hi a champion thei a nih chuan, atan Wimbledon title pariatna a ni ang; champion hnem ber Roger Federer a nihrual dawn chiah. Grand Slam champion hnem lamah Margaret Court-i a nihrual thei dawn bawk.

Kum 36 mi Djokovic chuan, "Theih ni se la chuan a tir aṭanga inkhelh nghal mai kha kan duh, mahse ground dinhmun kha chetsual a hlauhawm a vangin inkhelh nghal kha a rem lo, entu lamin rei tak min nghah a ngaih avangin pawi ka ti hle.

"Stadium hi khuh a nih chuan a boruak hi a danglam ṭhin, a chung hawn leh khuh inkar hi a danglam em avangin inkhelh pawh a awlsam lo, chutiang kara hnehna ka chang thei hi ka lawm," a ti.

Djokovic hian a match lehpekah chuan world number 70 Jordan Thompson a tum dawn - Australian player hian inkhel dangah Brandon Nakashima chu set nga an khelh hnuin a lo hneh ve thung.

Inkhel dangah Andrey Rublev a chak. Russian tlangval hi nikum khan an ram leh Ukraine an indo avangin Wimbledon a khelh ve phalsak a ni lo, kuminah seeded pasarihna pek niin Max Purcell chu 6-3, 7-5, 6-4 in a hneh.

Rublev chuan, "Wimbledon hi ka la khel tam lo, hliam vanga ka inlan theih loh lai a awm a, chumi hnuah hripui leng lehin chumai bakah indo vangin ka tel thei lo bawk. Kuminah harsatna nei loa ka khel thei ta hi ka lawm hle," a ti.

Russian tlangval Rublev hi indo duh lotu langsar tak a ni. Nikum February thla khan Dubai Championship an khelh laiin camera-ah 'indo lo hram ang' tih a lo ziak lang tawh a, he thu hian sawizui pawh a hlawh hle.

Rublev chuan, "Tharum thawhna leh inbeihna hi kei chuan ka thlawp ngai lo ang. Chutihrualin tennis tana ṭha tur ber kan ngaihtuah a nih pawhin, inkhel thei lo tura player hrem ringawt kha thil ṭha ber chu a ni chuang lo," a ti.

Champion tura rinkai zinga mi Casper Ruud pawh a chak. Seeded palina Ruud hian Laurent Lokoli chu 6-1, 5-7, 6-4, 6-3 in a hneh - kuminah hian a vawi khat nana Grand Slam hmasa ber a beisei sang hle.

Inelna lian Grand Slam hnuhnung pangaah Ruud hian ṭum thum ngawt final a lut thei a, mahse a chak lo zawkah a ṭang vek. French Open final-ah pawh khan Djokovic a ngam lo, tun ṭumah hian rinkai berte zinga mi a ni phak.

Player langsar dang - Lorenzo Musetti, Hubert Hurkacz, Felix Auger-Aliassime, Jannik Sinner leh Grand Slam vawi thum champion tawh Stan Wawrinka te chuan an khingpui ṭheuh hnehin second round an inhlangkai ve bawk a ni.