I League-ah club thar panga an awm dawn!
July 3, Thawhṭannia All India Football Federation’s Executive Committee ṭhukhawm chuan I League-ah club thar panga awm turin an pawm a, I League khelh dilna thehluttu club panga dilna chu pawm vek a ni - committee-ah hian Lalnghinglova Hmar chu a tel.
May thlatir khan AIFF chuan Tier 1, 2 & 3-ah India ram khawpuite ṭhen hrangin, heng an tarlan khawpui aṭang hian I League-a hmun ruak awm chu pawisaa chhan theih an ruahman a, chhanna panga an hmuhte chu an pawm vek a ni.
Season thar I League-a khelh diltute hi YMS Finance Pvt Ltd (Varanasi, UP), Namdhari Seeds Pvt Ltd (Bhaini Sahib, Punjab), Nimida United Sports Development Pvt Ltd (Bengaluru, Karnataka), Concatenate Advest Advisory Pvt Ltd (Delhi) leh Bunkerhill Pvt Ltd (Ambala, Haryana) an ni.
Mahse, Vanglaini thudawn danin Bunkerhill lam hi inhnukdawk leh thei dinhmunah an ding a, anni hi Kolkata club lian Mohammedan Sporting Club nena thawkdun sa an nih avangin Mohammedan lama sum sen chhunzawm zel hi an thlang leh zawk mai thei.
A kalphung
AIFF-in tier I a tih hi New Delhi, Bengaluru, Pune, Gurugram, Chennai, Mumbai, Ahmedabad, Guwahati leh Noida te an ni a, tier 1 aṭanga I League club neih tumte chuan vaibelchhe nga aia hniam loin hmun ruak hi an chhan a ngai.
Tier 1 hi Nimida United Sports Development Pvt Ltd (Bengaluru) leh Concatenate Advest Advisory Pvt Ltd (Delhi) te chuan an chhang a, an chang. A chhanna tur pawisa neih ringawt hi a tawk zo lo - tier 1 aṭanga chhangtu chuan a tlem berah vaibelchhe 100 hausakna a neih a ngai a, hei hi AIFF chuan uluk takin a zirchiang leh a, I League club nei tlaka a ngaih hnuah a pawm leh chauh a ni.
Tier 2-ah hian Ranchi, Itanagar, Jalandhar, Ludhiana, Phagwara, Coimbatore, Manjeri, Thiruvananthapuram, Bhopal leh Shillong te dah an ni a, tier 2-ten vaibelchhe 2.5 tal insen an huam a ngai a, vaibelchhe 50 neih a ngai bawk - heta ṭang hian I League club neih dil an awm lo.
Tier 3 bik atan hian khawpui thlan an awm lo a, Panchayat inrelbawlna hnuaia awm khuaten tier 3 kaltlang hian I League club nei turin an 'bid' ve thei. Mahse, khelmual ṭha leh training-na hmun, airport aṭanga kilometre 200 aia hla loah an neih a ṭul thung - anni hian vaibelchhe khatin an chhang a, hausakna vaibelchhe 40 tal neih a ngai a, Namdhari Seeds Pvt Ltd lamin an chang.
A pawmtu
AIFF League Committee chuan dilna zawng zawng hi uluk takin a thlir leh a, Lalnghinglova Hmar kaihhruai committtee hian heng company liante hian sum nei tura an beisei ang zat sum an nei em, tih thlengin an en dik.
June 30 khan MFA honorary secretary Lalnghinglova Hmar kaihhruaina hnuaiah League Committee hi an inrawnkhawm leh a, dilna lut zawng zawng hi pawm tlakah ngaiin, AIFF Executive Committee-ah pawmpui turin an thlen.
July 3, Thawhṭannia AIFF Executive Committee ṭhukhawm chuan League Committee thu thlen hi an ngaihtuah a, an rawt angin I League club panga dilna hi pawmpui a ni ta a ni.
Mahse, tarlan tawh angin Bunkerhill lam hi Mohammedan SC nena thawk dun sa an ni a, MSC nena thawhdun hi an duh zawk chuan I League-ah hian an tel thei dawn lo - thla khat chhung hun pek an ni.
Club hming
Season hman zawh tak I League-ah khan club 12-in inelna an hmachhawn a, club pahnih an relegate - second division aṭangin Delhi FC leh Shillong Lajong an inpetkai thung a, champion RoundGlass Punjab-in Indian Super League an khel dawn thung.
Chumi awmzia chu I League-ah club pakua an awm mek a, second division aṭanga kai thar nen club 11 an awm tihna a ni - AIFF-in bid a hawn aṭangin club paliin an belh dawn chiang a, tarlan tawh angin Bunkerhill dinhmun a chiang lo.
Bengeluru aṭanga bid chhangtute hi FC Bengaluru United niin Varanasi aṭanga khel tur hi Inter Kashi tih an ni a, Punjab aṭanga khel turte hi Namdhari FC tih an ni thung.
Hetihlai hian Delhi aṭanga khel tur club-ten club hming an la nei lo a, Bunkerhill lam hi an dinhmun a la chian loh avangin an club hming a la hriat theih loh bawk.
Ruahmanna
Bunkerhill chhiar tel lohin season thar I League-ah club 15-in inelna an hmachhawn dawn a, USA lama an league kalphung chu entawn tura ruahmanna siam a ni - a chhan langsarah chuan senso a tlem zawk nana tih a ni.
India ram a zauh avangin home & away-a inkhelhna senso a tam ṭhin a, Kashmir aṭanga Mizorama inkhelhte chu hautak tak a ni. Hemi a nih avang hian I League team-te chu conference system in, group hnihah ṭhen an ni ang.
Group hniha ṭhen club-te hi mahni group ve veah an inkhel kual ang a, group pahniha top four chin ve vein season tawp lamah champion an inchuh leh ang - hei hi ruahmanna mai a ni a, a taka pawm erawh a la ni lo thung.
Hei chauh a ni lo - football-in ngaihven a hlawh lehzual theih nan, football ngainatna state ni si, mahse, I League emaw ISL club emaw nei lote state-ah match khel tura ruahmanna siam a ni bawk.