Wimbledon : American player pahnih Gauff leh Venus an tla nghal

Wimbledon an khel ṭan chauh a, inelna neih ṭan niah American player langsar pahnih tleirawl Coco Gauff leh veteran Venus Williams te chu an zinkawng a tawp nghal a ni.

Thawhṭanni zan inkhelah seeded pasarihna Gauff hian Sofia Kenin chu 6-4, 2-6, 6-4 in a hneh lo. Kenin hian Australian Open 2020 nomawi a chawi a, a hnu lamah hliam leh harsatna vangin a dinhmun a hniam ta hle.

Tunah erawh harsatna nei loin a inkhel thei ve leh ta a, player theihna nei sang leh hlauhawm a nihna chu a takin a lantir; a match lehpekah chuan Chinese nula Wang Xinyu nen an inhmachhawn leh dawn a ni.

Kum 19 mi Gauff hian 2019 aṭang khan Wimbledon hi a khelh tawh, a inlan hmasak ber hian kum 15 mi chauh a la ni–a tel hmasak ber ṭum hian vawi nga champion tawh Venus Willams an hneh a, mi hriat a hlawh–tun ṭum hi hneh nei loa a tlakna hmasa ber a ni hial.

Hmeichhe singles inkhel dangah Venus-i pawh a che fuh lo. Kum 43 mi Venus hi Elina Svitolina lakah 6-4, 6-3 in a chak lo, inkhelh laklawh laiin a khup dinglam a hliam a, a ṭhat dan takin a khel chhuak thei lo.

A vanglai chuan Venus Williams tan Wimbledon hi hmun nuam leh rangkachak a ni tawh ṭhin, vawi nga ngawt a champion tawhna hmun a ni. Mahse, tunah chuan a kum tamin a vanglai a liam tawh, inkhelh la chawlhsan chiah lo mah se player hlauhawm a ni phak tawh lo a ni.

American player pahnih an chak loh lai hian Iga Swiatek erawh a chak. World number 1 Swiatek hian Zhu Lin lakah harsatna a tawk lo, nuamsa tak 6-1, 6-3 a hnehna changin second round a inhlangkai.

Kum 22 mi Swiatek hi tunlai a khelh dan thlir chuan champion tura rinkai a ni, mahse grass court inelna lianah hian fourth round a la paltlang ngai loh avangin a dinhmun tur hi huaisen taka sawi lawk theih erawh a ni chiah lo.

Seeded pakhatna Swiatek chuan, "Season hmasa kha chuan grass bikah inkhel hmasa miah loin Wimbledon ka khel a ni a, a boruak kha a danglam hle. Kuminah chuan inbuatsaihna ka nei a, ka khelh dan pawh a danglam ka beisei," tiin a sawi.

Inkhel dangah seeded palina Jessica Pegula leh seeded pangana Caroline Garcia te pawhin an khingpui ve ve hnehin first round an paltlang ve bawk. Pegula hian Lauren Davis 6-2, 6-7 (8-10), 6-3 in a hneh a; Garcia pawhin 6-4, 6-3 in Katie Volynets a hneh.

Player langsar dang Victoria Azarenka pawhin Yue Yuan chu 6-4, 5-7, 6-4 in a hneh a, seeded 11-na chang phak Daria Kasatkina pawhin 6-1, 6-4 in American player Caroline Dolehide chu a hneh ve bawk.