Al-Ettifaq coach thar Steven Gerrard

Liverpool legend Steven Gerrard-a'n Saudi Arabia a pan loh tur thu a sawina chil per pawh a la hul hman lo–chanchin thar kan hriat chu Saudi Pro League club Al-Ettifaq a zawm thu a ni a, Aston Villa boss hlui hian Asian football-ah club a enkawl dawn.

Kum 43 mi Gerrard hian thla hmasa lawk khan Saudi club Al-Ettifaq nen an indawr ngei thu a sawi a, chutihrual chuan Saudi club a zawm loh tur thu a sawi tel bawk–mahse, Gerrard leh Al-Ettifaq an inbe nawn leh a, a tawpah chuan English coach hi an hmin ta, niin a lang.

Al-Ettifaq chairman Khalid Al-Dabal chuan, "Gerrard neih hi kan league hian nasa takin hma a sawnpui ang, tih hi rinhlelh rual a ni lo," a ti a, Saudi-a Gerrard an thlem lut thei chu a lawm hle.

Gerrard hian Saudi club hi kum hnih chhung enkawl turin contract a ziak a, Liverpool captain hlui hian eng zat chiah nge a hlawh dawn tarlan ni lo mah se kum khatah euro maktaduai 20 a hlawh dawn niin khawthlang media-te chuan an tarlang.

Rangers aṭanga a coaching career ṭantu Gerrard hian Scottish club-ah khan kum khatah £2.5mtd a hlawh nia sawi a ni a, Villa-ah khan kum khatah £5mtd hlawhin, Aston Villa coach ni tawh zinga hlawh hnem ber a ni hial.

Mahse, Scottish Premiership-a Rangers champion pui thei coach hian English football-ah vanneihna a tawng lo a, nikum October khan Villa hian an coach aṭangin an ban–hna nei loa a awm reng hnuah Saudi lam a hawi zui ta a ni.

Captain Fantastic hminglem an pek ṭhin Gerrard-a hian kum 2016 khan inkhel chawlhsanin, Liverpool academy-ah te coach ni tura a intahhriam hnuah kum 2018 khan Scottish club Rangers a zawm.

Mizo tlangval Jeje Lalpekhlua pawhin trial a lo neih tawhna Rangers hi 2020-21 season-ah khan Scottish Premiership-ah a champion pui a, kum 10 hnua an nomawi hmasa ber a nih avangin Gerrard-a'n fak a hlawh hle. Mhase, Villa a zawmsan hnuah beisei a phak lo a, tunah chuan Saudi lam a hawi ve ta thung.

Hetihlai hian Fulham boss Marco Silva chuan Al-Hilal enkawl tura sawmna chu a hnar a, Portuguese coach hian an sawmna hi pawm ngat se chuan kum khatah pound maktaduai 17 vel hlawhtir an inhuam niin an sawi.

AS Roma boss Jose Mourinho pawh Saudi Arabian club Al-Ahli hian an dawr bawk a, mahse, Portuguese coach hian kum khata £26mtd hloha Saudi club enkawl ai chuan AS Roma enkawl chhunzawm a thlang zawk a ni.