Ronaldo nena khel dun tur Brozovic

Inter Milan midfielder Marcelo Brozovic chuan Barcelona aiin Saudi Arabia lam pan a thlang a, hmanni lawka Champions League final kheltu player hian Cristiano Ronaldo nena khel dun turin Al-Nassr a zawm.

La Liga champion Bar-celona pawhin Brozovic hi an legend chhuak ta Sergio Busquets thlak turin an duh nia sawi a ni a, mahse, Brozovic hian nghak deuh mah se sum lama talbuai Barca hi an chet hleihtheih loh avangin nghah reng ai chuan Saudi lam pan hi a thlang ta niin khawthlang media-te chuan an tarlang.

Al-Nassr chuan Brozovic-a manah hian euro maktaduai 18 an seng nia sawi a ni a, kum thum atan contract a ziak niin an tarlang bawk–a hlawh zat hi sawi lan ni lo mah se, a hrechiangtute chuan kum khatah pound maktaduai 30 a hlawh phak dawn niin an sawi.

Croatia tan vawi 87 inlana goal sarih khungtu Brozovic hian an ram club Hrvatski Dragovoljac aṭanga a professional zinkawng zawh ṭanin, Lokomotiva leh Dinamo Zagreb tan an khel leh a, January 2015 khan kum khat leh a chanve chhung atan loan-in Inter Milan a zawm.

Milan khaw club hian a loan zawh hnuah a nghetin an lalut zui a, match 330 khelhsaka goal 31 khungin, assist vawi 43 a nei a, Serie A (1), Coppa Italia (2) leh Supercoppa Italiana (2) nomawi te a chawipui hman a ni.

World Cup 2018-a Croatia-in final an luh theih nan player pawimawh a ni a, World Cup 2022-ah pawh hmun pawimawh chang zuiin, pathumna an nih theih nan a thawhhlawk hle.