Chelsea coach thar Pochettino a zám lo

Premier League hrechiangtu a ni a, a team thar enkawl tur chungchangah Mauricio Pochettino a phur hle - Blues chu tun hnai kum 15 bawr vel chhunga English team ropui ber an nih thu a sawi chhuak.

Kum 2004 hnu lamah Chelsea hian nomawi chi hrang hrang 21 tehmeuh an chawi, heng zingah hian Premier League nomawi panga leh Champions League nomawi pahnih a tel.

Mahse, season hmasa khan an hmang ṭha lo hle. English football inelna sang berah hian 12-na ni chungin season an khar, kuminah European football an khel phak dawn lo a ni.

Southampton leh Tottenham Hotspur manager hlui Pochettino chuan, "Tun hnai kum 10, 12, 15 chhung kan en chuan Chelsea hi England rama team ropui ber an ni," tiin a club thar chu a dahsang hle.

Argentina manager chuan sawi zawmin, "Premier League hi ka hrechiang a, chutiang bawkin Chelsea kalphung pawh ka hrechiang bawk. Min ṭantu fans lam pawhin lawmna an neih leh thuai ka beisei," tiin a sawi.

Kum 51 mi Poch hian team enkawl ṭha pangngai viau mah se nomawi chawi a harsat ṭhin. Paris Saint Germain a enkawl lai erawhin nomawi pathum a chawisak - England ramah erawh season ruk a hman tawhah eng title mah a la lo.

Poch chuan, "Player naupang leh hmabak nei eng tak tak kan ngah a, thil tum ṭha leh mumal tak kan nei bawk. Nakina team nghet leh ṭha tak din turin training ground aṭangin bul kan ṭan ang.

"Ka tan chuan Chelsea Football Club enkawltu nih hi a hlu em em a, khawvel huap pawha club ropui berte zinga mi a nih avangin ka tan chuan Blues zawm tura thutlukna siam pawh kha a awlsam hle," tiin a sawi.

American sumdawng hausa Todd Boehly-a'n thuneihna a chan hnuah, season khat chhungin manager nghet pahnih Thomas Tuchel leh Graham Potter te an ban a, manager lailawk Frank Lampard chuan beisei a phak lo hle bawk.

Kumin January thla bazar lai ringawt khan player lakluh nan pound maktaduai 288 an hmang, an sum hman hi Bundesliga, La Liga, Serie A leh Ligue 1 club zawng zawngin an hman aiin a tam zawk hial.

Mahse, result ṭha an nei chuang lo. Tunah nipui bazar an hmang mek a, coach thar Pochettino hnuaiah an inhralh tawl mek. Kalidou Koulibaly, Edouard Mendy leh N'Golo Kante te chuan Saudi Arabia an pan.

England midfielder Mason Mount, Kai Havertz leh Mateo Kovacic ten Premier League lama an elpui tur an zawm san a, hei bakah hian Ruben Loftus-Cheek pawhin AC Milan a pan fel tawh bawk.

Player langsar an chhuah nual lai hian France striker Christopher Nkunku chu RB Leipzig aṭangin pound maktaduai 52-in an lei a, hei bakah hian Villarreal aṭangin Senegal forward Nicolas Jackso an la fel tawh.

Pochettino chuan, "Club thuneitu leh sporting director-te nen kan inbia a, thil tum mumal leh chiang tak kan nei. A pawimawh berte min ṭantute hlimna thlen a ni, chumi tur chuan result ṭha kan neih a ngai dawn.

"Chelsea chu midang chunga awm tur leh result ṭha nei tur a ni, chumi tur chuan hna kan thawk ang," tiin a sawi a, a player la kawl lai zingah pawh chhuak tur an la awm nualin a rinawm.

Chelsea hian European football an khelh dawn loh avangin England rama inelna hoah rilru an sawngbing thei dawn tih a ni.