Luton Town-in centre back Andersen an lalut

Premier League kai thar Luton Town pawhin tla lehnghal tura Englsh top flight league khel an ni dawn lo tih an thiltih hmangin an pholang zel a, Danish defender Mads Andersen chu Barnsley aṭangin an lalut.

Luton Town chuan Andersen-a contract rei zawng hi an tarlang lem lo a, a man zat pawh official taka puanzar a ni lem lo. Kum 25 mi centre back hian kum 2019 khan Danish club AC Horsens aṭangin Barnsley a zawm a, tunah chuan Luton lam panin Premier League a khel ve dawn ta.

Championship playoff final-a Coventry City hnehtu Luton boss Rob Edwards chuan, "Mads kan lalut thei hi ka lawm takzet a, hun rei tak chu kan lo enthla tawh a ni.

"Season hman zawh taka a inkhelte kan lo en reng a, a khel ṭhain English football hahthlak takah chetsual a nei ngai lo. Tlarhnung khawiah pawh a khel thei a ni," a ti.

Andersen chuan, "Ka theihna zawng zawngin ka khel dawn a, ka theihna zawng zawng ka hlan zel ang. 100% team player ka ni e," a ti a, team tan chuan eng pawh tihhreh a neih loh thu a sawi.

Luton hian Republic of Ireland winger Chiedozie Ogbene chu Rotherham United aṭangin an lalut tawh a, kum 28 mi forward Cauley Woodrow chu contract thar an ziahpui bawk.