Celtic aia Saudi pan thlang zawktu Jota

Saudi Arabian club Al-Ittihad chuan Celtic winger Jota an lalut a, Saudi Pro League-ah hian kum thum chhung khel turin contract a ziak - a man atan pound maktaduai 25 an inseng.

Portuguese winger hian Al-Ittihad-ah hian kum khatah pound maktaduai 10 vel a hlawh dawn nia sawi a ni a, Celtic-a a kum khat hlawh £884,000 nena khaikhin chuan a intam hleih hle.

Kum 24 mi Jota hian kum 2020 khan Benfica aṭangin Celtic hi loan-in a zawm a, season khat hnuah Scottish club hian £6.4mtd sengin a nghetin an lalut.

Scottish club tan season hnih chhunga match 83 khelin goal 28 a khungsak a, assist vawi 26 a nei bawk. Player hmabak nei êng tak nia ngaih ni mah se Saudi an lo lang a, a hlawh let tam tak pe theitu hnar hi a tan a harsa.

Hei chauh a ni lo - Celtic chhuahsanin Saudi pan mah se Al-Ittihad-a a inkhelhpui turte hi Celtic ai chuan an hraw zawk tia sawi ngam a ni a, he club hian Ballon d'Or kawltu Karim Benzema leh Chelsea midfielder hlui N'Golo Kante te an lalut tawh!

Celtic hian inthuam ṭhat hna an thawk mek bawk - coach Ange Postecoglou-a'n Tottenham Hotspur a zawm hnuah an coach hlui Brendan Rodgers an lalut a, Liverpool boss hlui hian a squad thuam chak hna a thawk mek.

Melbourne City aṭangin kum 21 mi winger Marco Tilio an lalut tawh a, midfielder Odin Thiago Holm chu Norwegian club Valerenga aṭangin an lalut tawh bawk.

Hetihrual hian Jota hma hian Celtic midfielder Aaron Mooy chuan kum 32 mi lek ni chungin inkhelh a chawlhsan thu a puang a, Celtic Japanese midfielder Reo Hatate chu Al-Ittihad hian lakluh tumin an hel bawk.

Hatate hian a tirah Europe-a inkhelh chhunzawm a duh thuin a chhang nia sawi a ni a, mahse, Celtic-a kum khata £624,000 hlawh nia sawi midfielder hi Saudi club hian sum tam zawk nen sawm hlawhtlin theih an inbeisei niin an sawi.