Palace-in Hodgson cham dawn tih an nemnghet

Crystal Palace chuan Thawhṭanni khan manager Roy Hodgson cham tur thu an nemnghet. English manager chuan Eagles tana contract a pawtsei theih avanga a inchhuan thu a sawi.

Kum 75 mi Hodgson chuan, "Kan team- hian kum naupang leh talent nei ṭha player kan kawl a, heng player-te uap tur hian tawnhriat nei player kan nei bawk. Chairman (Steve Parish) nen kan inbiaknaah pawh tum sang tak neih a ṭul thu kan sawi a, table chung lama awm hi thil theih a ni," tiin a sawi.

English manager hian kumin March thla khan Patrick Vieira a thlak a, tla thei dinhmuna ding Palace chu match 10-ah point 18 hmuh puiin 11-naah season a kharpui.

Hodgson hian kum 45 chuang manager hna hi a thawk tawh a, England team bakah Inter Milan, Blackburn, Fulham, Liverpool leh West Brom te a enkawl tawh a ni.