Celtic-ah Furuhashi a rinawm

Japan striker Kyogo Furuhashi chuan Celtic-ah a contract neih lai chu kum li chhung atan a pawtsei. Season liam ta khan Celtic hian an ramchhunga inelna pathumah an champion vek a, manager Ange Postecoglou-a'n Tottenham pan mah se Furuhashi erawh Scottish club tan a rinawm thung.

Kum 28 mi Furuhash hian kum 2021 khan Vissel Kobe aṭangin Celtic hi a zawm a, match 83 khelin goal 54 a khungsak. Japanese striker chuan, "Brendan Rodgers hi khawvela manager ṭha zinga mi a ni a, club hrechiangtu a nih bakah nomawi chawi dan a hria," tiin Postecoglou hnung zui lo a, Brendan Rodgers hnuaia khelh a thlan thu a sawi.

Liverpool leh Leicester City manager hlui Rodgers pawhin Kyogo Furuhashi-a'n contract a ziah belh chu chanchin lawmawm a nih thu a sawi ve bawk.