Tuithiang leh MSVT ten second round an lut

Aizawl DFA buatsaih Second Division khel tur zawnna chu Lammualah khelh chhunzawm zel a ni. Nimin khan Tuithiang FC leh Mission Vengthlang FC ten second round an lut.

Group E-ah Tuithiang FC dinhmun a ṭha sa a, an khingpui tur Lalte Zaidam FC an inlan lo. Hemi hma hian RGSA FC khingpui tur Saiktawlh FC an inlan lo bawk. Tuithiang hian RGSA hi an hneh tawh avangin match thumah point kua hmuin an tling.

Group F-ah Mission Vengthlang FC-in an khingpui FC Durtlang 4-0 in an sawp a, match thumah point sarih hmuin an group aṭangin an tling ve bawk. MSVT hi Mizo coach ṭha zinga mi Victor Lalbiakmawia enkawl a ni a, Second Division tling chho tura rinkai zinga mi an ni.

Second round lut tawhte chu Reuben FC (Group A), Armed Veng FC (Group B), Aizawl South FA (Group C), Orison FC (Group D), Tuithiang FC (Group E) leh Mission Vengthlang FC (Group F) te an ni.

Vawiin hian group G leh group H ten match hnuhnung ber an khel dawn a, second round lut tur a hriat kim theih ang. Second round-ah hian team pariat chu group hnihah an inṭhendarh dawn a, an inkhelh kual hnuah group khat aṭangin pahnih ve ve Second Division khel turin an tling ang.