Brentford-in Collins an la dawn

Premier League club Brentford chuan Wolverhampton Wanderers defender Nathan Collins lalut turin Wolves chu inremna an neihpui a, Republic of Ireland international manah hian pound maktaduai 23 an theh chhuak ang.

Kum 22 mi Collins hian season hmasa ṭan dawn khan Wolves hi Burnley aṭang hian a zawm ve chauh a, hetihlai hian £20.5mtd man a ni - pound maktaduai thumin a man a pung hman! Collins hian Burnley-ah pawh khan season khat bak a khel hman lo.

Collins hian season hman zawh takah khan Wolves tan match 31 a khel a, Premier League table-ah 13-na nihpui chungin season a khar.

Hetihlai hian Wolves chuan Napoli-in £30mtd-a defender Max Kilman lei an dilna chu an hnawl a, Serie A champion hi pawisa tam zawk nen an lo lang leh dawn em, hriat a la ni lo.

Brentford hi an inthuam chak mek zel - Collins hma hian £22mtd man forward Kevin Schade chu an hnenah loan-a a khelh hnuin a nghetin an la a, Netherlands goalkeeper Mark Flekken lakluh nan £11mtd an lo seng tawh bawk. Thomas Frank-a'n season thar hmachhawn turin Brentford a thuam chak mek zel.