Iran-in hmeichhe pawngsualtu mi 3 khaihlum

Iran chuan nimin khan hmeichhe pawngsual vanga thiam loh chantir mi pathumte chu a khaihlum.

Judiciary website-in a tarlan danin, heng mi pathumte hian kum 2021 kum tawp lam kha Hormozgan province-ah cosmetic surgery clinic lem siamin, hmeichhiate chu mutna damdawia chiuin an pawngsual ṭhin niin a sawi. Pawngsual thubuai leh damdawi rua puhna thubuai 12-ah thiam loh chantir an ni.

Hormozgan chief justice Mojtaba Ghahramani chuan nimin zing khan Bandar Abbas tan-inah mi pathumte hi khaihlum an nih thu a sawi. An zinga pakhat chu medical assistance niin, pahnih chu nurse an ni.

Iran hi China tih lohah chuan thiam loh changte tihhlum tamna ber ram a ni a, nikum khan mi 582 a khaihlum a, hei hi kum 2015 hnua kum khata tihhlum an tam ber kum a ni tih human rights group, Amnesty International chuan a sawi. Kuminah June thla thlengin mi 354 khaihlum an ni tawh bawk a, a tam zawk chu ruihhlo kaihhnawih thubuaia thi tura an chungthu relsakte an ni. Tihhlum zingah hian hmeichhia paruk an tel a, mi pahnih chu mipui hmuhah khaihlum an ni bawk.