Kenya President-in ramhnuaia thing kih khapna hlip

Kenya President Willian Ruto chuan an rama kum ruk chhung ramhnuaia thingkung kih khapna an lo siam tawh chu a hlip.

President Ruto chuan tualchhunga thing indaih lohna a nasat hle laia ramhnuaia thingkung ṭawih raltir mai mai chu thil atthlak tak a ni tiin, "Kan ṭhalaite tan hna thawh tur siamna turin ramngawa thing an lak kan phalsak a ni," a ti.

Kum 2018-a deputy president a nih lai khan Ruto hian leilung ven himna leh, khawkheng laka invenna turin ramhnuaia thingkung kih khapna thupek hi a tichhuak a ni. Nikum khan sik leh sa inthlak danglam zel laka invenna tur kawng khat atan, kum 20 chhung Kenya rama thing tluklehdingawn 15 phunna tur ruahmanna pawh a lo tlangzarh tawh bawk.

Greenpeace Africa chuan thingkung kih khapna hlih a nih chu sawiselin, hei hian environment-ah nghawng ṭha lo tak a nei dawn tih an sawi. Petition theh lutin, Kenya rama ramngawte chu species vang leh dangdai tam tak awmna a ni, heng ram ngaw hi mi tam takin ei tur leh damdawi lakna atan an hmang a ni, a ti. Kum ruk liam taa sorkarin thing kih a khap aṭang khan ramngaw humhalhna kawngah hmasawnna nasa tak a thleng a, sik leh sa danglam avanga chhiatna thleng ṭhin pawh a ziaawm phah a ni, an ti. Mahse khapna thupek hi hlih a nih chuan an hna lo thawhte chu a thlawn vek dawn a, an ramngawte chu a nghawng zel tur ngaihtuah lo thingkittu kutah a tlu lut dawn a ni, an ti.