Barty leh Halep an tlang

Australian Open inbuat-saihna tournament zinga mi Adelaide International khelh laiah Ashleigh Barty leh Simona Halep te chuan harsa angreng takin quarterfinal an inhlangkai.

Thawhlehni inkhelah tualchhung nula Barty hian Anastasia Pavlyuchenkova chu a hneh hram. Darkar hnih leh minute riat an inkhelh hnuah 4-6, 6-3, 7-5 in a chak a, tun season inelna pahnih a hmachhawn tawhah a chak vawi khatna a ni hial.

French Open champion lai hi kar hmasa khan Brisbane International-ah a inlan a, a match hmasa berah Jennifer Brady hneh loin a tla nghal - tun inelnaah erawh thawnthu a danglam ta. World number 1 Barty hnung zuiin Halep pawh a tlang. Romanian nula hian Ajla Tomljanovic 6-4, 7-5 in a hneh a, kumina tournament a khelh hmasak berah bul a ṭan fuh hle.

Season hmasa khan Halep hian Wimbledon title a la a; Grand Slam champion thei lo tia sawisel ṭhin tute chu nomawi hmangin a chhanglet. January 20 aṭanga khelh tur Australian Open pawh hi tun hma lama final a thlen tawhna a nih avangin beiseina a nei sang ang. World number 1 hlui hian Tomljanovic lakah hian vawi 19 winners a vaw chhuak thei a, unforced errors vawi 11 chauh a neih bawk avangin a khel ṭha thawkhat hle.