Manchester United number 7 ha tur Mount

Mason Mount chuan kawr pawl hlipin kawr sen a ha ta. Manchester United-in English midfielder duhawm ber zinga mi Mount hi pound maktaduai 55-in an lalut a, a chet ṭhat dan a zirin pound maktaduai nga an pek belh dawn. Nimin khan Man United chuan Mount hi kawr sen nen an pho chhuak ta a; Eric Cantona, David Beckham leh Cristiano Ronaldo te larpui number 7 a ha dawn.

Chelsea-in player ṭha an chân a ni ringawt lo a, Blues chhul chhuak dik tak an chhuah. Mount hian kum ruk a nih aṭangin London club hi a zawm a, Chelsea ṭantute zingah club leh player thutlukna vanga thinur pawh an ṭhahnem – tlumtea thlir taka an thlirin Stamford Bridge chhuahsana an elpui club a zawm hi hriatthiam a har ngei ang.

Mount chuan, "Tum sang tak ka nei a, nomawi chawi nawmzia ka hria a, chumi tura tih ngai pawh ka hria. Manchester United tana nomawi chawi leh turin theihtawp ka chhuah ang. Mi zawng zawngin Erik Ten Hag hnuaiah Man United-in hma an sawn tih kan hria," tiin a sawi.

A insawifiah

Thawhlehni khan Mount chuan a chhuah tur thu hi a sawi a, thuziak hmanga chinfel mai duh loin social media-ah video kaltlangin a insawifiah.

Kum 24 mi Mount chuan, "Chelsea chhuahsan turin thutlukna ka siam. Kum 18 chhunga ṭha taka min ṭawiawmna avanga lawmthu sawi hi ziak chauh ni loin ṭawngka ngeia ka sawi ngaihthlak hi in phu.

"Ṭhenkhat chu ka thutlukna vangin in lawm dawn lo tih ka hria a, chutihrualin ka tan chuan ka career thlirin thutlukna siam hun tak a ni. Inpawm thiam ngei ka beisei," tiin a sawi.

Mount hian amah enkawltu manager Frank Lampard, Thomas Tuchel leh Graham Potter te chungah lawmthu a sawi a; Chelsea academy, backroom staff leh a khelhpui ṭhinte chungah lawmthu a sawi bawk.

United lakluh hmasa ber

Season tawp lam khan Manchester United hi neitu thar nei tura sawi an ni a, hei vang hian nipui bazarah pawh tal na tura ngaih an ni. Mahse, Man United-in neitu thar an neih theih loh avangin transfer-a hman tur sum an ngah lo.

Erik Ten Hag-a'n an sum hman theih zat a hre reng chungin Mount lak nan pound maktaduai 60 a seng ngam. Nipui bazara an sum hman theih tur zat chanve a hmang zo der niin sawi a awm. Chumi awmzia chu Ten Hag hian Mount hi a dah pawimawh hle tihna a ni.

Chelsea hian Man United dilna hi ṭum thum an hnawl a, hemi hnu hian an inrem thei chauh. Mount hi season liam ta thlir chuan Man United-in an lalut hi a mak a, chutihrualin season hmasa lam 2021-22 season-a a chet dan thlir chuan a phu viau thung.

Season liam ta khan league-ah Mount hian match 24 chauh a khel a, goal thum chauh khungin assist vawi hnih a nei. Chance siam zat pawh vawi 30 a ni a, goal shot pawh vawi 20 chauh a nei bawk.

Kum 2021-22 season-ah kha chuan Mount hian match 32 a khel a, goal 11 khungin assist vawi 10 a nei a, season liam ta nen chuan a inthlau hle. England lamah pawh Euro 2020-ah khan Mount hi rinrawl a ni a, World Cup 2022-ah kha chuan group stage match hmasa pahnihah bul ṭan mah se knockout chinah minute 25 chauh a khel. Gareth Southgate-a'n Mount aiah Jordan Henderson a thlang.

Mount hi Chelsea leh England-ah a pawimawhna a tlahniam ve ve a, kum 24 mi chauh a nih avangin a theihna anga khel chhuak leh turin a club khelhna thlak hi a pawimawh. Blues pawhin an academy chhuak player talent nei ṭha chân bawk mah se sum ṭhahnem tak an hai luh phah tih hriat a ṭha.

Man United hian Mount an lalut fel a, Inter Milan goalkeeper André Onana lam an hawi lehnghal. English club hian pound maktaduai 39 an theh chhuak a, Inter lamin an hnawl. Italian club hian pound maktaduai 51 bawr vel (€60m) an beisei a, indawrna an neih chhunzawm zel ang. Onana hian Old Trafford-a kal a duh.

Belhchian dáwl Mount

Season liam ta khan Mason Mount hian league match 24 chauh a khel a, goal thum a khung. Chutihrualin Mount hi Chelsea senior team tana season li chhung khel tawhin hemi hun chhung hian Blues tan match khel tam ber, goal khung tam ber, assist ngah ber, goal zawna ball pet tam ber leh chance siam hnem ber a ni.

Statistics aṭanga thlir chuan Manchester United-in Mount lei nana sum ṭhahnem tak an seng ngam hi a mak lo. Hei bakah hian Mount hi kum 24 chauh a la ni a; Champions League, UEFA Super Cup leh Club World Cup a chawi tawh–tawnhriat a nei ṭha hle.

Chelsea aṭanga inzir chhuak Mount hian a naupan lai pawhin sulhnu a nei ṭha. Mount hian Blues hi Premier League Under 18 leh UEFA Youth League a chawipui bakah FA Youth Cup-ah vawi hnih ngawt a champion.

England-in Euro 2020 final an khelh khan player pawimawh a ni a, Three Lions hi Euro Under 19 C'ship (2017) ah champion puiin 'golden player award' a dawng. Chelsea-ah hian Player of the Year vawi hnih a ni tawh a, UCL nomawi an chawi ṭumin UEFA UCL squad of the season-ah a tel.

Chelsea tana a khelh phak hma hian loan hmangin Vitesse leh Derby County-ah te a kal a, Dutch club leh English club tan hian a che ṭha ve ve. Vitesse Player of the Year bakah Eredivisie Team of the Year-ah a tel a, a sulhnu chhui letin belhchhian a dawl a, theihna sang tak a nei a ni ■