Hun Inher

Cricket mi hrang MS Dhoni-a'n Indian Premier League nomawi a tawpna atan a chawi (?) aṭangin thla te a lo ral a, ram tana inkhelh a chawlhsan hnua India team-in ICC hnuaia inelnaa nomawi an chawi hleithei ta tlat lo erawh BCCI mang tiangtu a ni chho zel.

India team hian World Test Championship-ah a zawnin final an lut a, hun pawimawhah an irhfiak leh tlat. Indian Cricket Dressing room boruak pawh a uap ve deuh churh ni awm tak a ni. Kumin favang lama ICC Cricket World Cup Hamara Desh-in a thlen hma hian, insiamṭha hman tak maw.

Duleep Trophy leh a chhehvel

BCCI 1st Class Cricket Domestic Season khelh zawh tak a, player khel ṭha ber berte chu an awmna state ṭheuh zone parukah ṭhendarh an ni a, team parukte hi a fir thlanchhuah an ni tihna a nih chu.

Kumin NorthEast Zone aiawhin Mizoram aṭangin Ramhlun Venglai rawlthar hmasawn chak tak Joseph Lalthankhuma chu Mizoram aiawh meichher kengtuah a ṭang ve leh a. Nikum lamah G. Lalbiakvela, Luangmual leh Bobby Zothansanga, Chaltlang te squad-ah an lo tel tawh bawk.

Ni e, a level a sang tawh a, dai ngai loh ram a ni a, thawklehkhatah Joseph-a hi a khel ṭha thut dawn lo. Mahse, an inkhelh hma ni hian phone lamah an captain nen hun rei tak kan titi a, he ṭhangthar laka beisei sang tak a neih thu leh tun anga a inpeka, a tum a ruh zel chuan, a aia sang zawka a la invawrh zel tur thu a sawi. A thu sawi ri kha ka bengah chuan rimawi a va tling si em.

NorthEast Zone hi team nem zinga mi an ni dawn. Team dang an tumpuite chu India aiawh tawh player-te leh India team-a tel inbeisei chin ṭhah an ni. Chutiang kara zam miah lo a, Mizo tlangval kan nei ve ta hi hmasawnna chu a ni phawt.

Ṭhangthar Hun

Ka professional zinkawng ka zawh tawp dawn season leh Joseph-a te Under 19 leh 23 level aṭanga an rawn graduate a, 1st class cricket an rawn dai ṭan ve kum a innang hlauh. Zep thu a cheng lo, heng valrual ho hi min retire tir tute an ni.

An rual ute aia coaching ṭha zawk dawngin, an rilru leh thinlung cricket khawvel inher angin a inher chho a, an tumruhna leh hmathlir kha a sang tlat tawh. Professionalism khawvel dik tak an rawn dai chho a, Mizoram Cricket-in hma a sawn zel tih a chiang.

Tui hna thar

Tuna ṭhangthar generation hi chu hlawhtling turin an ril a ṭam a, kan mitthla let hian, Joseph-a hi kan team hotel-ah te, a senior zawk leh rual u zawkte pindanah lo lengin, kan tawnhriat leh lo dai tawh ram aṭanga, a cricket zinkawng atana pawimawh tur ṭhahnem tak ngaithla turin ka inleng kha a ni fo ṭhin.

Chutiang bawkin nikum lama kan headlines luahtu ber Dawrpui Vengthar ṭhalai Jehu Anderson te hi, kan inhmuh apiangin, hmasawn a ngaihna lai tur leh a aia ṭha zawka a khelh leh dan tur, thurawn hi keini tehlul ka aṭang hian vawiin thleng hian a la beisei ṭhin. Chutiang zelin midang pawhin thurawn an la a, hmasawn an duh ang bawkin keini pawhin hma sawn se kan duh a ni.

Result aiin Kalphung Dik

Infiamna khawvelah hian champion, khelh ṭhat, nomawi chawi hi a tum ber chu a ni tehmeuh mai, mahse tunlai khawvel hmanhmawh takah hi chuan 'Instant Noodles' hi kan duh dan a ni. Rang taka result neih nghal hi kan duh dan a ni a, hei vang tak hian hlawhtlinna kawng hi kan ringhlel fo a, kan hlawhchham phah ṭhin.

Mahse maw! hman aṭanga tun hun thlengin hlawhtling tur hian 'Short Cut' a la awm chuang lo tih hi theihngilh loh a ṭha. Kalphung (Process) dik kan zawm a, kan kal zel chuan, result hian a rawn zui mai zawk a ni tih hi hre thar leh ta ṭheuh ila a ṭha awm e.