Al-Ahli-ah Firmino a kal fel

Liverpool tana contract hmang zo Roberto Firmino chuan Saudi Arabian club Al-Ahli a zawm fel ta. Brazilian forward hian season thum daih contract a ziak a, a club tharah hian Chelsea goalkeeper hlui Edouard Mendy nen an khel dun ang.

Kum 31 mi Firmino hian season hmasa tawp rual khan Reds tana a contract a hmang zo. Hoffenheim aṭanga Anfield a pan hnuah Premier League club tan hian match 362 aṭangin goal 111 a khungsak hman.

Mohamed Salah leh Sadio Mane te nena inkawpin Firmino hi Liverpool hmatawng pawimawh a lo ni tawh ṭhin, kum 2019 khan Champions League nomawi an chawi a, a hnu kumah Premier League title la lehin, kum 2022 khan FA Cup leh League Cup an la bawk.

Mahse, manager Jurgen Klopp-a'n tlarhma lama khel tur a lak belh zel a, man tam taka Darwin Nunez an lak bakah Coady Gakpo an nei a, mual sira khel thei Diogo Jota leh Luis Diaz an la nei bawk - season hmasa khan Firmino hi rinrawl a ni phak tawh lo.

Firmino bakah hian Naby Keita, Alex Oxlade-Chamberlain leh James Milner te chuan tun nipuiah hian Reds tana an contract hmang zoin Anfield an chhuahsan vek, season tharah chuan Liverpool hian team hmel thar an nei ang.