Alcaraz tan hna a awlsam
Carlos Alcaraz chuan Wimbledon mipa champion thei naupang pathumna nih a tum a, a match hmasa berah a chak nuamsa hle. Thawhlehni zan inkhelah veteran player Jeremy Chardy chu 6-0, 6-2, 7-5 in a sawp.
Spanish tlangval hian a match hmasa ber atan Centre Court ala chang lo, Court One-ah inlanin a hna erawh a tlin hle - ruah sur leh grass hnawng avangin court pahnihah chiah hian Thawhlehni tlai khan match an khel zo thei.
Kum 20 mi Alcaraz hian set thum an khelh chhungin game sarih chiah a hloh a, hnehna chang tur hian darkar khat leh minute 53 bak a mamawh lo. Grand Slam-ah chuan a tir lamah hun hman tlem hi a tawp lamah a pawimawh ṭhin.
US Open 2022 champion Alcaraz chuan, "Ka kum rualpui zungah hian tennis player ṭha tak tak an awm, chung mite nen chuan hun ropui tak kan tawn chhoh theih ngei ka beisei, ka rualpui zingah hian a ṭha ber ka ni bik lo," a ti.
World number 1 ni thei naupang ber Alcaraz chuan, "Ka player puite hi en ila - kum 21 mi Jannik Sinner a awm a, Holger Rune nen pawh kan inrual reng, ani nen phei chuan kan intawn tawhah a chak lo zawk ka ni lehnghal.
"Chuvangin a ṭha bik ka ni lo a, tournament ṭhenkhatah a vannei bikah ka ṭang rih mai a ni," tiin a sawi a, a rualpui dangte chu midang chunga leng thei tura theihna nei sang vek an ni tih a sawi bawk.
Thawhlehni zan khan Roger Federer chuan Wimbledon hi a hmunah a en, mahse Centre Court-ah kalin mibik ṭhutna Royal Box-ah a ṭhu; vawi riat champion tawh Swiss star hi mipui lamin ding chungin zahna chibai an lo buk a ni.
Alcaraz chuan, "Wimbledon en turin Roger Federer a lo kal tih ka hria a, kan inkhelhna hmunah zawk a lo kal lo erawh a pawi ka ti, grass court inelna liana ka inkhel hi a hmunah ngei min en ve thei se ka ti hle.
"Tennis tana mi bik a ni a, a taka biak theih pawh ka chak," tiin Federer a dahsang thiam hle a ni. A match lehpekah chuan Alexandre Muller leh Arthur Rinderknech inkhela chak zawk a hmachhawn leh ang.
Inkhel dangah Andy Murray pawh a chak. Britain tlangval Murray hian amah ang bawka tualchhung mi Ryan Peniston chu 6-3, 6-0, 6-1 in a hneh a, vawi hnih a champion tawhna hmunah bul a ṭan fuh hle.
Grand Slam vawi thum champion tawh Murray chuan, "Centre Court-a ka kir leh thei hi ka lawm, ka tan chuan a lunglen thlak bawk," a ti a, a match lehpek erawh a hautak tawh dawn - Dominic Thiem leh seeded pangana Stefanos Tsitsipas inkhela chak zawk a hmachhawn ang.
Thiem-a'n Stefanos Tsitsipas lakah set khatna 6-3 in a la a, set hnihnaah erawh Greek tlangval Tsitsipas-a'n 4-3 in hma a hruai ve thung, khua in a bumro zui tak avangin an inkhel tluan thei ta lo, ruahman dan chuan nizan khan khelh chhunzawm tura tih a ni.