Brazil coach tur Ancelotti

Brazil Football Confederation (CBF) president Ednaldo Rodrigues chuan, kum 2024 Copa America an khelh hunah chuan an ram team enkawltu chu tuna Real Madrid coach Carlo Ancelotti hi a ni tawh tur thu a sawi.

Ningani khan Brazil chuan an coach lailawk atan Fernando Diniz an ruat a, kum khat daih inremna an siam - a hnu lamah erawh Italian coach Ancelotti kutah a awm zui dawn.

CBF president Rodrigues chuan, "Fernando Diniz hian football khelh dan phung nghet leh ṭha tak a nei, chu a khelh dan phung chu Copa America 2024 kan khelh huna kan coach tur Ancelotti-a duh dan nen a inmil," a ti.

World champion vawi nga ni tawh Brazil hian Tite-a hnuah coach nghet an la nei lo. World Cup 2022 quarterfinal-a an tlak hnu khan Tite hi a bang a, coach hrang hrang an sawi zingah Ancelotti chu an duh ber a ni.

Kum 64 mi Ancelotti hian Real Madrid tan kum 2024 June thla thleng daih contract a nei mek, tun hnai khan Brazil team enkawl nghal mai tur anga sawi ni mah se contract a hman zawh tur thu a tichiang a, amah sawi ang ngeiin Spanish club lian a phatsan lo.