Galtier-a'n PSG a chhuahsan, a thlaktu tur Enrique?

Christophe Galtier chuan season khat chhung lek Paris Saint-Germain a enkawl hnuah French champion hi a chhuahsan. PSG-ah hian Galtier hian season khat dang contract la nei mah se club nena an inbiakrem hnuah a chhuak.

PSG chuan, "2022-23 financial year zawhah PSG leh Christophe Galtier chuan contract titawp turin thutlukna an siam. Club chuan a inpekna leh a professional-na avangin kan chhuang a, a vawi 11-na atana French champion mintihpui avangin kan lawm," tiin thuchhuah an siam.

Qatar Sports Investments-in PSG an lei hnuah French club hian sum ṭhahnem tak hmang mah se an duh ber Champions League nomawi an chawi thei lo. Khawvel player ṭha bera mi ṭhahnem takin an chhal Lionel Messi an lakluh hnuah UCL last 16-ah ṭum hnih an tla a, ruahmanna thar an siam.

Messi-a'n PSG a chhuahsan a, Neymar leh Kylian Mbappe pawh an nghet lo. Parisians hian head coach atan Luis Enrique an lalut dawn a, he thu i chhiar meuh chuan a chiang tawh hial ang.

PSG leh Enrique an sawizawmna hi a rei tawh a, Spanish manager hian club indintharna tur kawngah pawh ruahmanna ṭhahnem tak a siam tawh niin a sawi. Champions League nomawi la chawi lo PSG-in European champion ni tawh manager Enrique chungah beiseina sang tak an nei ang.