Leeds United manager thar Daniel Farke

Premier League aṭanga Championship-a tla hlim Leeds United chuan manager thar atan Daniel Farke an lakluh thu an puang a, Norwich City manager hlui hian kum li daih contract a ziak.

Kum 46 mi German manager hian Canaries-ah season li chhung a awm a, Premier League ṭum hnih a kaipui. Farke hian Championship-ah ṭum hnih ngawt Norwich a champion pui avangin inelna hi a hrechiang a, chutihrualin Premier League aṭangin ṭum hnih a tlakpui tih hriat tel a ṭha bawk.

Farke chuan, "Ka chungah mawhphurhna leh beisei sang tak an nghat ngam hi ka lawm a, result hmanga thungrulh ngei ka tum ang. A pawimawh hmasa ber chu inlungrualna leh thawhhona ṭha a ni a, ka thawhpui staff leh player-te nen theihtawp kan chhuah dawn. Min ṭantuten ṭha taka min thlawp ka beisei bawk," tiin a sawi.

Leeds hian season liam ta khan Premier League-ah beisei an pha lo a, result ṭha an neih loh avangin manager pahnih an ban. Season tawp lamah Sam Allardyce lalut mah se an inhamtang zo chuang lo.

Whites manager thar Farke hian Norwich aṭanga an ban hnuah Russian club Krasnodar a zawm. Amaherawhchu, Russia-in Ukraine an run avangin match khat pawh enkawl loin an ram Germany-ah a kir a, Borussia Monchengladbach a enkawl ta thung.

Fakre hian Glabdach-ah kum thum daih contract a ziak a, season liam ta khan 10-na a nihpui. Season tharah erawh Farke hian sulhnu a neih ṭhatna Championship club enkawl a thlang a, Premier League-ah Leeds United hruai kir a tum dawn a ni.