Mi bikte huangah Novak Djokovic

Tennis inelna lian ber leh ngaihhlut bik Grand Slam huangah Novak Djokovic chuan match 350 hnehna a chang tling ta a, player ropui bik Roger Federer leh Serena Williams-i te huangah a tel ta chiah.

Nilaini zan Wimbledon second round inkhelah Djokovic hian Jordan Thompson chu 6-3, 7-6(4), 7-5 a hnehin third round a lut a, hnehna chang tur hian darkar hnih leh minute 28 bak hun a mamawh lo.

Serbian star Djokovic hian inkhel a thunun hneh viau, set hnihna bikah world number 70 Thompson hian point hnih chauha thlauh lai a nei a, amaherawhchu tawnhriat nei ṭha zawk chu a hunah tak a che fuh leh ta zawk a ni.

Grand Slam vawi 23 champion tawh Djokovic chuan, "Set hnihnaah khan Jordan Thompson kha a vanduai zawk mai chauh a ni, a khel ṭhain set lak pawh a phu ka ti," tiin a khingpui chu a fak.

Grass court bikah Djokovic hi vawi 30 a chak zawn tawh a, tun inelna neih laiah pawh champion tura rinkai ber a ni. Wimbledon title hi a vawi riat nan a la thei a nih chuan champion hnem ber Federer a nih rual ang.

Mipa singles inkhel dangah Stefanos Tsitsipas chuan set hloh hmasa mah se Dominic Thiem chu 3-6, 7-6(1), 6-2, 6-7(5), 7-6(8) in a hneh. Anni pahnih hi Thawhlehni zana inkhel tawh an ni a, ruah sur vangin an inkhel zo mai lo - Nilaini zan khan an zo fel thei chiah.

A chak zawk Greek tlangval Tsitsipas hian nizan khan Andy Murray a hmachhawn chhunzawm leh nghal a, chanchinbu buatsaih lai hian result kan hre hman lo. Murray hian a match hmasa lamah Ryan Peniston a lo hneh tawh thung a ni.

Player ṭha zinga mi Daniil Medvedev pawh a chak, seeded pathumna hian world number 391 Arthur Fery chu 7-5, 6-4, 6-3 in a hneh a, grass hi a inkhelh thiamna hmun tak a nih loh avangin atan thil a awlsam lo.

US Open 2021 champion Medvedev hian season a hmang ṭha, kuminah nomawi panga a chawi tawh - All England Club, London-a inelna neihah erawh hi chuan fourth round a la pel ngai lo a, atan kumin hi hun ṭha a ni thei tura beisei a ni.

Russian tlangval hi season hmasa kha chuan a inlan thei lo - indon buaina avangin Russia leh Belarus player-te chu grass court inelna lianah hian nikum khan tel an phal lo, kuminah erawh dan pangngaiin an inlan leh thei tawh.

Thawhṭanni zana inkhel ṭan tawh Taylor Fritz leh Yannick Hanfmann te pawh Nilaini zanah an zo chiah! Zan hmasa berah eng (light) ṭha lo vangin an buai a, a zan hnihnaah ruah in a bumro zui leh - zan thumnaah Fritz hi 6-4, 2-6, 4-6, 7-5, 6-3 in a chak.

Seeded 10-na Frances Tiafoe pawhin Wu Yibing chu 7-6 (7-4), 6-3, 6-4 in a hneh a, thla hmasa lama Stuttgart Open champion a nihna chu a chhawrṭangkai dawn niin a lang, hmabak erawh a la hautak chho dawn.

Inkhel dangah Tommy Paul pawhin Shintaro Mochizuki 7-5, 6-3, 6-1 in a hneh a, tun hma lama final hial pawh lut tawh Milos Raonic chuan kum 2019 hnua a vawi khat nan Wimbledon bikah hnehna a chang ve leh chiah, a khingpui Denis Novak 6-7 (5-7), 6-4, 7-6 (7-5), 6-1 in a hneh.