India tan theihtawp ka chhuah zel dawn - Lianzuala

Mumbai City forward Lallianzuala Chhangte chuan India tan nomawi tam zawk chawi tura theihtawp a chhuah zel tur thu a sawi a, tha thlah mai a tum lo.

AIFF Player of the Year-a thlan hlim Lianzuala hian Thawhlehni zan khan SAFF Championship-ah India a champion pui a, kuminah Hero tri-nation series leh Hero intercontinental Cup nomawi a chawi bawk.

Lianzuala chuan, "Club leh ram tana khelh chu thil danglam tak a ni. Club-ah chuan kan ṭhat dan bera kan khelh theihna turin player ṭha tak tak kan la khawm a, inkhelh pawh a awlsam zawkin ka hria.

"Goal thun pawh a harsa lo zawk. Mahse, ram tan a nih chuan mahni liau liaua thawhchhuah a ngaih chang a awm ṭhin a, khelhpui tur a thlan theih lo a, a harsa bik êm êm a ni," a ti a, India tan hmun pawimawh chang tura theihtawp a chhuah zel tur thu a sawi.

Lianzuala hian season hman zawh takah khan Mumbai City tan inelna hrang hrangah match 32 khelin goal 18 a khung a, assist vawi kua a nei bawk.

Blue Tigers tan kuminah match 11 khelin goal thum a khung a, assist vawi khat a nei - kum khata ram tana match a khelh tam ber leh goal a khung tam ber ṭum a tawng mek. Kum chanve a la liam chauh a, Lianzuala chanchin kan la hriat belh zel a rinawm.

Lianzuala hian mimal ang pawhin kuminah chawimawina a dawng hnem hle - AIFF Player of the Year a nih bakah ISL-ah Hero of the League a ni a, Sunil Chhetri tih loha ISL-a Indian player zinga Golden Ball dawng thei hmasa ber a ni. FPAI Indian Player of the Year-ah thlan a ni bawk.

Lunglei tlangval Lianzuala hian a professional career-a a zinkawng ngaihnawm leh a beih dan hrang hrang hi 'John-a nen Khelmual Titi' programme-ah a sawi chhuak a, Lianzuala kawmna hi zanin dar 8:00 hian Zonet Zawlbuk & Zonet HD-ah pekchhuah a ni dawn a, Zonet YouTube member tan en theih a ni dawn bawk a ni.